არჩევნების მეორე ტურამდე 12 დღე რჩება - ბათუმის მერობისთვის ორი მსხვილი პარტიის წარმომადგენელი იბრძვის
პოლიტიკა
არჩევნების მეორე ტურამდე 12 დღე რჩება. ბათუმის მერობისთვის ორი მსხვილი პარტიის წარმომადგენელი იბრძვის. ერთ მხარეს, 9 წლის შემდეგ პირველად დამარცხებული „ქართული ოცნების“ კანდიდატია, მეორე მხარეს კი გაერთიანებული ოპოზიციის შეთანხმებული პრეტენდენტი. არჩილ ჩიქოვანიც და გიორგი კირთაძეც გამარჯვებას აანონსებენ, თუმცა საბოლოო შედეგები მხოლოდ კენჭისყრის შემდეგ გახდება ცნობილი. მოლოდინებისა და შეფასებების ხმამაღლა განცხადებებისგან თავს კვლავ იკავებენ ექსპრემიერის გუნდში. თეო ფუტკარაძე გვიამბობს, როგორ აფასებენ პარტიები კანდიდატების შანსებს არჩევნების მეორე ტურში?
პირველ ტურში დამარცხების მიუხედავად არჩილ ჩიქოვანი, ფარხმალს არ ყრის და მეორე ტურში გამარჯვების მოლოდინი აქვს. მმართველი პარტიის კანდიდატს ხმების პროცენტული მაჩვენებელი, ბარიერის გადასალახადაც არ ეყო. მეტიც, გაერთიანებული ოპოზიციიის კანდიდატმა, გიორგი კირთაძემ, მას დაახლოებით 700 ხმით აჯობა. ამის მიუხედავად, ჩიქოვანს ოპტიმისტური მოლოდინი აქვს.
არჩილ ჩიქოვანის ოპტიმისტური მოლოდინების მიუხედავად, ოპოზიციაში სხვაგვარ განაჩენს ელოდებიან. ხელისუფლების ოპონენტები დარწმუნებულნი არიან, რომ განმეორებით კენჭისყრაშიც გაერთიანებული ოპოზიციის კანდიდატი გაიმარჯვებს. ევროპულ საქართელოში, საკუთარ მოლოდინს ცვლილებებისთვის ბათუმელების მზაობით ხსნიან, რაც მათი თქმით, საკრებულოს ოპოზიციური უმრავლესობით დაკომპლექტებაშიც აისახა.
შეთანხმებული ოპოზიციის კანდიდატის გამარჯვების მოლოდინი აქვთ „ლელოშიც“. აქ ამბობენ, რომ არჩილ ჩიქოვანისა და გიორგი კირთაძის წარსულიც და დღევანდელი შესაძლებლობებიც განსხვავებულია. პარტიაში მიაჩნიათ, რომ ქალაქის განვითარებისთვის ოპოზიციურად განწყობილი მერი აუცილებელია.
არჩევნებამდე სულ რაღაც 12 დღე რჩება. ამის მიუხედავად, გადაწყვეტილების ბერკეტის მქონე, ექსპრემიერის პარტიას პოლიტიკური ორიენტირი ჯერ კიდევ გაურკვეველი აქვს. გახარიას გუნდში, არ ასახელებენ რომელი კანდიდატია მათთვის მისაღები. მათი თქმით, ბათუმის მერობის ორივე პრეტენდენტი წარსულის გადმონაშთია და შესაბამისად, მხარდაჭერას არცერთ მათგანს უცხადებენ. პარტიაში „საქართველოსთვის“ ამბობენ, რომ მთავარი შედეგი მიღწეულია და საკრებულო კოალიციურად დაკომპლექტდა. რომელი პოლიტიკური გუნდის მხარეს გადაწონის გახარიას სასწორი- საზოგადოებაში არსებულ კითხვებს, ბათუმის საკრებულოს თავმჯდომარის არჩევის დროს გაეცემა.
„ნაციონალურ მოძარაობაში“ ფიქრობენ, რომ გაერთიანებული ოოზიციის კანდიდატი ღირსეულად გაიმარჯვებს და ზეიმისთვის ემზადებიან. პარტიის წევრების შეფასებით, გიორგი კირთაძეს თვითმმართველობის საკითხებში კარგი გამოცდილება აქვს და ქალაქისთვის ბევრი სასიკეთო ცვლილების მოტანა შეუძლია.
2 ოქტომბრის თვითმმართველობის არჩევებზე ბათუმის მერობისთვის 8 კანდიდატი იბრძოდა. მათგან მეორე ტურში ერთმანეთს ორი ყველაზე მსხვილი პარტის წარმომადგენელი უპირისპირდება. განმეორებით კენჭისყრაში 50 +1 ბარიერი არ მოქმედებს და გაიმარჯვებს ის, ვინც ამომრჩევლისგან, თუნდაც ერთი ხმით მეტს მიიღებს.