30, ოქტომბერი 2021 09:40:00
"„ნაციონალურ მოძრაობას“ არ აქვს გეგმაში არჩევნები, გეგმაში აქვთ, რომ იყოს დაპირისპირება" - ასე ეხმაურება საქართველოს კულტურის მინისტრი, სუს-ის სახელმწიფო გადატრიალების მცდელობის ფაქტზე დაწყებულ გამოძიებას.
თეა წულუკიანის თქმით, "ქართული ოცნება" და არცერთი ქართველი აღარ დაუბრუნდება წარსულს.
„ჩვენ გუშინ ვნახეთ, რომ სახელმწიფო უსაფრთხოების სამსახურმა გაასაჯაროვა ის გამოძიება, რომელსაც ის აწარმოებს. ეს გახლავთ სახელმწიფო გადატრიალების მცდელობის ფაქტები, რომელზეც ის სხვადასხვა სამუშაოს აწარმოებს გამოძიების ფარგლებში. ჩვენ იმედი გვაქვს, რომ ძალიან მალე დავინახავთ შედეგს, მაგრამ შედეგის დანახვამდე, ერთი რამ ნათელია, „ნაციონალურ მოძრაობას“, როგორც ჩვენ ამას ყოველთვის ვამბობდით, რა თქმა უნდა, არ აქვს გეგმაში არჩევნები. მათ გეგმაში აქვთ, რომ ამ ქვეყანაში იყოს კიდევ დაპირისპირება და კიდევ შეეცადონ რომ არალეგიტიმური და უკანონო მეთოდებით დაბრუნდნენ ხელისუფლებაში, მაგრამ ეს ვერ მოხდება. ჩვენ ასევე ვნახეთ, რომ არსებობს უკვე ხელშესახები, თვალსაჩინო მტკიცებულებები, რომ გვარამია და „ნაციონალური მოძრაობა“ აყალბებდა ყველა იმ კვლევას, რომელსაც თავად ატარებდა და გუშინ მოუწიათ IPSOS-ის უკრაინის ოფისთან დაპირისპირება, რადგან სინამდვილეში კვლევამ აჩვენა, რომ ზუგდიდში იგებს წოწერია. „ნაციონალური მოძრაობის“ კვლევამ აჩვენა, რომ ზუგდიდში იგებს წოწერია, მათ კი თქვეს, რომ იგებს მელია. ეს არის ის, რა მეთოდითაც ისინი მუშაობენ. მაგრამ დღეს მჯერა, რომ სამეგრელოში და ზუგდიდში, რა თქმა უნდა, მოიგებს „ქართული ოცნება“და არც ერთი ჩვენი ქვეყნის კუთხე და რეგიონი არ დაუბრუნდება წარსულს“, - განაცხადა თეა წულუკიანმა.