08, ნოემბერი 2021 11:43:00
ცვლილებები მუნიციპალიტეტების საკრებულოებში. წარმომადგენლობით ორგანოებში ფრაქციის შექმნის წესი იცვლება. ერთი პოლიტიკური პარტიის წარდგენით არჩეული საკრებულოს წევრები მხოლოდ ერთი ფრაქციის შექმნას შეძლებენ.
საკრებულოებში ფრაქციების ფორმირების ეს წესი პარლამენტის რეგლამენტის ანალოგიურია.
ცვლილებები “ადგილობრივი თვითმმართველობის კოდექსში“ ხორციელდება, რომელიც ფრაქცია “ქართული ოცნების“ დეპუტატებმა მოამზადეს. ინიციატორთა განმარტებით, ორგანოებში ფრაქციების შექმნის წესის ცვლილებით მცირე ფრაქციების ხელოვნურად შექმნა გამოირიცხება.
ჯერ კიდევ მოქმედი “ადგილობრივი თვითმმართველობის კოდექსით“ საკრებულოში ფრაქცია შეიძლება ორი ან მეტი პარტიის წევრებმა შექმნან.