მიხეილ სააკაშვილი შიმშილობის შეწყვეტას აპირებს, თუმცა, გარკვეული დათქმებით. საქართველოს მესამე პრეზიდენტის, გადაწყვეტილება მისმა უფლება დამცველმა მას შემდეგ გაახმოვანა, რაც გლდანის ციხის ტერიტორია დატოვა. ნიკა გვარამიას თქმით, სააკაშვილი შიმშილობას შეწყვეტს, თუ მას შესაბამის სამოქალაქო კლინიკაში გადაიყვანენ, ხოლო მის ჯანმრთელობაზე ექიმების კონსილიუმი იზრუნებს. სააკაშვილი ასევე, აცხადებს, რომ იგი ითვალისწინებს სტრასბურგის სასამართლოსა და ევროპელი პარტნიორების მოწოდებებს. ექს-პრეზიდენტი წერილში აღნიშნავს, რომ გლდანის საავადმყოფოში არც, შესაბამისი ტექნოლოგიური პირობებია და არც კვალიფიციური ექიმები, რის გამოც, დაწესებულებას უნდობლობას უცხადებს.
დღეს, სპეციალურმა პენიტენციურმა სამსახურმა მიხეილ სააკაშვილის რუსთავის ციხიდან გლდანის სასჯელ აღსრულების დაწესებულებაში გადაყვანის ღირსების შემლახველი კადრები გაასაჯაროვა, სადაც კარგად არის ასახული, რომ საქართველოს მესამე პრეზიდენტი ციხის თანამშრომლებს წინააღმდეგობას უწევს. უწყებამ ექს-პრეზიდენტის ტრანსპორტირების კადრების გავრცელება, მაღალი საზოგადოებრივი ინტერესით ახსნა. განცხადებაში აღნიშნული იყო, რომ სააკაშვილი სამართალდამცავების მხრიდან კანონიერ მითითებებს არ ემორჩილებოდა და მათ სიტყვიერ შეურაცყოფას აყენებდა.
გარდა ამ ვიდეო-კადრებისა პენიტენციურმა სამსახურმა ის მასალებიც გაავრცელა, რომელიც სააკაშვილის იძულებით გადაყვანას ასახავდა, უწყების მიერ გავრცელებულ ვიდეოში, კარგად ჩანს, თუ როგორ ეწინააღმდეგება საქართველოს მესამე პრეზიდენტი ციხის თანამშრომლებს. კადრების გასაჯაროების შემდეგ იუსტიციის მინისტრმა გამართა პრესკონფერენცია, რომელსაც მხოლოდ სამთავრობო მედიის წარმომადგენელები ესწრებოდნენ. ბუნებრივია რატი ბრეგაძემ ბრიფინგისას ის თქვა, რაც მას სურდა, დამატებითი კითხვები კი არ დასმულა.
ნიკა მელიას შეფასებით, ხელისუფლება იძულებული გახდა, რომ ექს-პრეზიდენტის კადრები გამოექვეყნებინა, რადგან წინააღმედეგ შემთხვევაში მათ თავის მართლება, სტრასბურგის სასამართლოში მოუწევდათ.
მიხეილ სააკაშვილის შესახებ პენიტენციური სამსახურის მიერ გავრცელებულ ვიდეოსთან დაკავშირებით განცხადებას არაერთ პოლიტიკოსთან ერთად სახალხო დამცველიც გამოეხმაურა. ნინო ლომჯარიას შეფასებით, სრულიად არაპროპორციული და შეურაცხმყოფელი ფორმით კადრების გავრცელებით, ირღვევა მისი პატივის, ღირსებისა და პირადი ცხოვრების ხელშეუხებლობის უფლება.
პენიტენციური სამსახურის მიერ გამოქვეყნებულ კადრებს უკრაინის სახალხო დამცველიც გამოეხმაურა. ლუდმილა დენისოვას თქმით, ვიდეო ადასტურებს ფიზიკური ძალის გამოყენებასა და ზიანის მიყენებას უკრაინის მოქალაქის, მიხეილ სააკაშვილის მისამართით. როგორც უკრაინის ომბუდსმენი აღნიშნავს, გავრცელებული ვიდეო ადასტურებს წამებასა და არაადამიანურ მოპყრობას, რაც ადამიანის უფლებების დაცვის კონვენციის მესამე მუხლის დარღვევას წარმოადგენს.
1
s
s
s