ბათუმში ისევ გათოვდა. სამდღიანი დიდთოვლობით გამოწვეული პრობლემები კი კვლავ მწვავედ დგას. მტელი დღის განმავლობაში ქალაქის ქუჩებში გადაადგილება, ძლიერი ყინვის გამო, გართულებული იყო. ამ დრომდე გაუწმენდავია ქუჩების ნაწილი ქალაქის ცენტრში, ასევე გარეუბნები და მეორეხარისხოვანი ქუჩები, რაც მოსახლეობას დამატებით პრობლემებს უქმნის. გადაადგილების კუთხით ყველაზე პრობლემური ე.წ. ჭაობის დასახლებაა. ტექნიკური მარილი ქალაქში საავტომობილო გზის მხოლოდ მცირე ნაწილზეა დაყრილი. ბათუმელების ნაწილი ტრანსპორტით მგზავრობას ფეხით სიარულს ამჯობინებს. ტროტუარების ნაწილი მოსახლეობამ და კომერციული ობიექტების მეპატრონეებმა თავად გაწმინდეს. მოსახლეობის დამოკიდებულება ქალაქის ხელმძღვანელობის მუშაობის მიმართ არაერთგვაროვანია. ბათუმის მერიაში კი ამტკიცებენ, რომ მოყინულ გზებზე მთელი ღამის განმავლობაში იყრებოდა ტექნიკური მარილი, მუშაობდა სპეცტექნიკაც, ეტაპობრივად გაიწმინდება გარეუბნებიც. რაც შეეხება ჭაობის დასახლებას, მერიაში განმარტავენ, რომ აქ ტექნიკის შეყვანა ვერ ხერხდება, რადგან მიმდინარე ინფრასტრუქტურული სამუშაოების გამო შესაძლებელია ტექნიკა მწყობრიდან გამოვიდეს. თუმცა ჩვენმა კამერებმა პრობლემები იმ ქუჩებზეც დააფიქსირა, სადაც ამ ეტაპზე ინფრასტრუქტურული სამუშაოები არ მიმდინარეობს - საუბარია თაყაიშვილის, სელიმ ხიმშიაშვილის, ძველი ბათუმის ქუჩებზე.
9
s
s
s