ზუსტად ათი წელი 2007 წლის 7 ნოემბრის მოვლენებიდან. წინ დღით, არასაპარლამენტო ოპოზიციის მიერ დაანონსებული საპროტესტო აქცია მიხეილ სააკაშვილის ხელისუფლებამ სწორედ ამ დღეს დაშალა. თბილიში, პარლამენტის წინ გაშლილი კარვების რბევა პოლიციამ და სპეცრაზმმა რეზინის ტყვიებით, ხელკეტებით, ცრემლსადენი გაზისა და წყლის ჭავლების გაშვებით დაიწყო. 7 ნოემბრის ღამით სპეცრაზმი „ტელეკომპანია იმედში“ და „ტვ 25“ შეიჭრნენ და მაუწყებლობები გათიშეს. „ტვ 25“ მაუწყებლობა მხოლოდ ათი დღის შემდეგ განაახლა. ძალის გამოყენებით დაშლილი ოთხდღიანი აქციების შემდეგ ქვეყანაში ორკვირიანი საგანგებო მდგომარეობა გამოცხადდა. პრეზიდენტმა რეფერენდუმი გამოაცხადა და ვადამდელი არჩევნებიც ჩანიშნა, რომელიც 2008 წლის იანვარში ჩატარდა. საპროტესტო აქციებით ოპოზიცია მიხეილ სააკაშვილის ხელისუფლების შეცვლას მოითხოვდა. მოთხოვნას საზოგადოების ნაწილიც შეუერთდა. საჯარო უწყებებთან ეწყობოდა „სირცხვილის კორიდორები“. სისხლიანი რბევის ქრონიკები დღემდე გამოუძიებელია.
2
s
s
s