სოფლის ცენტრამდე წინ კიდევ დიდი მანძილია გასავლელი, მიკროავტობუსს გადაადგილებაში ტრადიციულად მგზავრები ეხმარებიან. დიდთოვლობის შემდეგ ჭახათის ცენტრალური მაგისტრალი როგორც ადგილობრივები ამბობენ, სრულყოფილად არ გაწმენდილა.
მძიმე ტექნიკა სოფელში მას შემდეგ გამოჩნდა, როცა ადგილზე ჩვენი გადამღები ჯგუფი მივიდა. აქ გაუწმენდავია, შიდა საუბნო გზებიც. ჭახათი ქობულეთის მუნიციპალიტეტის ერთ-ერთი მაღალმთიანი სოფელია. იგი ქალაქიდან 16 კილომეტრში მდებარეობს.
დიდთოვლობამ პრობლემები მუნიციპალიტეტის სხვა სოფლებშიც შექმნა. იმის გამო, რომ გზები კვლავ გაუწმენდავია, მუნიციპალური ავტობუსები მოძრაობას ვერ ახერხებს.
მუნიციპალიტეტში წყალმომარაგების კუთხითაც პრობლემები შეიქმნა. ხუცუბნის 800-მდე ოჯახი ამ დრომდე სასმელი წყლის გარეშეა. ქობულეთის 22 საბავშვო ბაღიდან კი სააღმზრდელო პროცესი დღეს მხოლოდ 5 დაწესებულებაში განახლდა. მიუხედავად იმისა, რომ ბაღებში საკვები პროდუქტები დროულად შევიდა, სააღმზრდელო პროცესი ბავშვების გამოუცხადებლობის გამო ჩაიშალა.
რაც შეეხება საჯარო სკოლებს, ქობულეთის რესურსცენტრის ინფორმაციით, საგანმანათლებლო დაწესებულებებში მოსწავლეების გამოცხადების დაბალი მაჩვენებელი დაფიქსირდა, თუმცა პროცესი არსად არ შეწყვეტილა.
მოსახლეობის პრეტენზიებს იზიარებენ ქობულეთის გამგეობაში, სადაც აცხადებენ, რომ ტექნიკის სიმცირის გამო, ყველა სასოფლო გზის ერთდროულად გაწმენდა ვერ მოხერხდება. 48 სოფლის გზას 14 ერთეული ტრაქტორი წმენდს.
ამ დროისათვის „ენერგო პრო ჯორჯიას“ ინფორმაციით, ქობულეთის მუნიციპალიტეტს ელექტროენერგია სრულად მიეწოდება.
13
s
s
s