20, დეკემბერი 2017 14:11:00
„ნაციონალური მოძრაობა“ აჭარის მთავრობის მიერ გამოცხადებულ ტენდერებს აპროტესტებს, რომლითაც მთავრობის აპარატი და აჭარის განათლების სამინისტრო 226 400 ლარად 5 ახალი ავტომობილის შეძენას გეგმავს. პარტიის წევრი ირწმუნება, რომ რეგიონში არსებული მძიმე სოციალური მდგომარეობის ფონზე ახალი ავტომობილების შეძენა არასწორია. რეზო ხარაზის ამბობს, რომ 97 ათას 200 ლარად განათლების სამინისტროს სედანის ტიპის ორი ავტომობილის შესყიდვა აქვს დაგეგმილი, დანარჩენი თანხა კი მთავრობის აპარატს ორი პიკაპის ტიპისა და ერთი სედანის ტიპის ავტომობილებისთვის აქვს გათვალისწინებული. აჭარის მთავრობაში ოპოზიციის საპასუხოდ აცხადებენ, რომ „ნაციონალური მოძრაობა“ მოსახლეობის შეცდომაში შეყვანას ცდილობს და მთავრობის აპარატი არა ორი, არამედ ერთი პიკაპის ტიპის ავტომობილის ყიდვას აპირებს, რომელიც ბესო ლილუაშვილის განმარტებით, მაღალმთიანეთში გადასაადგილებლად აუცილებელია. რაც შეეხება სედანის ტიპის ავტომობილს, ტენდერი ჩავარდა და უწყება მანქანას სავარაუდოდ მომავალ წელს შეიძეს. ორი სედანის ტიპის ავტომობილი კი, რომელსაც განათლების სამინისტრო შეიძენს, რესურსცენტრებისთვისაა გათვალსიწინებული.