23, ივნისი 2018 20:05:00
,,საფრანგეთი-საქართველო“-ს ავიატურის ფარგლებში, ბათუმის აეროპორტში დღეს 18 მოყვარული პილოტი საკუთარი თვითმფრინავით დაეშვა. ბათუმის შემდეგ ტური საქართველოს სხვადასხვა ქალაქებში გაგრძელდება. 24 ივნისს თვითმფრინავები ბათუმიდან ჯერ ნატახტარის აეროდრომზე გადაფრინდებიან, შემდეგ კი სხვადასხვა ტურის მიხედვით გააგრძელებენ მოგზაურობას. ვიდრე ბათუმს დატოვებენ, ევროპელი პილოტები თანმხლებ პირებთან ერთად ქალაქის ღირშესანიშანობებს გაეცნობიან. ავიარალს მხარდაჭერა გამოუცხადეს აჭარის მთავრობის ხელმძღვანელობამ, საქართველოს ტურიზმის ეროვნულმა ადმინისტრაციამ, საქართველოს სამოქალაქო ავიაციის სააგენტომ და საქართველოს ნავიგაციის დეპარტამენტმა. მიზანი, საქართველოს ტურისტულ ბაზარზე ახალი ტურისტული მიმართულების დამკვიდრების ხელშეწყობაა. სამომავლოდ ელოდებიან საკუთარი თვითმფრინავის მქონე კიდევ უფრო მეტ უცხოელ პილოტს. ავიატური ავიაკომპანია Service Air-ის და ფრანგი პილოტის მიშელ კოლინოს ორგანიზებით დაიგეგმა.