28, ივნისი 2018 17:05:00
მძღოლების აქციის პარალელურად, საკრებულოს წევრებმა იმ პროექტს დაუჭირეს მხარი, რომლის მიხედვითაც ის კრიტერიუმები განისაზღვრა, რასაც სამარშრუტო ტაქსები უნდა აკმაყოფილებდნენ. ასევე, გაირკვა თუ როდის დაიწყება აღნიშნული მიმართულებით კონკურსი. ემზარ ქავჟარაძის თქმით, ტრანსპორტის შერჩევა უახლოეს პერიოდში დაიწყება. სხდომაზე დღესვე სამგზავრო ავტობუსებისთვის ნებართვის მიღების ფასი განისაზღვრა. ავტობუსებისთვის 20 ლარი დარჩა, ხოლო მიკროავტობუსებისთვის 5-დან 50 ლარამდე გაიზარდა. საკრებულოზე ბათუმის მუნიციპალური ბიუჯეტის გაზრდას დაუჭირეს მხარე. ფინანსური დოკუმენტი 1 მლნ 472 ათასი ლარით იზრდება. თანხები ემატება ინფრასტრუქტურულ სამუშაოებს. კერძოდ, ეს ეხება საკანალიზაციო სისტემის რეაბილიტაციას. 250 ათასი ლარით იზრდება სარეზერვო ფონდი. მუნიციპალური სერვისების სააგენტოს ბიუჯეტი 171 ათასი ლარით გაიზარდა. არჩილ ვანაძის განცხადებით, თანხის უმეტესი ნაწილი საშტატო ნუსხის მომატებას და მათ საოფისე უზრუნველყოფას მოხმარდება. საფინანსო-საბიუჯეტო სამსახურის უფროსის თქმით, გაზრდილი საშტატო ნუსხა ქალაქში ხმაურის რეგულირებას და ზედამხედველობას გაუწევს კონტროლს.