22, თებერვალი 2017 20:58:00
ე.წ. ციანიდის საქმეზე დაკავებული დეკანოზი გიორგი მამალაძე მატროსოვის ციხეში გადაიყვანეს. ბრალდებულის ადვოკატმა დღეს გაავრცელა განცხადება იმის თაობაზე, რომ დეკანოზი გიორგი მამალაძე პატრიარქთან ან მაღალი იერარქიის სასულიერო პირებთან შეხვედრას ითხოვდა. დეკანოზი აპირებდა დეტალურად მოეყოლა თუ ვის ეკუთვნოდა იარაღი და რატომ ინახავდა იგი მას საცხოვრებელში. ადვოკატი ამბობს, რომ საბრალდებო დასკვნაში პატრიარქის მდივან რეფერენტის მოწამვლის მცდელობასთან ერთად დეკანოზს იარაღის უკანონოდ შენახვა-შეძენასაც ედავებიან. ადვოკატის განცხადებას დღეს პატრიარქის მდივანი გამოეხმაურა. მიქაელ ბოტკოველის განმარტებით მისი უწმინდესობის ჯანმრთელობის მდგომარეობა ამ ეტაპზე არ იძლევა იმის საშუალებას, რომ მან საპატიმროში დეკანოზი გიორგი მამალაძე მოინახულოს. რაც შეეხება მღვდელმთავრებთან შეხვედრას, მისივე განმარტებით, სახელმწიფოს მხრიდან თხოვნა იყო, რომ სასულიერო პირებს საპატიმრო დაწესებულებაში მისვლისაგან თავი შეეკავებინათ.