25, თებერვალი 2017 20:26:00
ეს ნიკო ჯაყელის ქუჩაა, ქალაქს შემოერთებული ტერიტორია, სადაც ინფრასტრუქტურის მოწესრიგება დღემდე არ დაწყებულა. აქ ადგილობრივები წვიმიან ამინდში რეზინის ჩექმებით გადაადგილდებიან. ატალახებული გზის გავლა განსაკუთრებით სკოლის მოსწავლეებს უჭირთ. ტერიტორიაზე მცხოვრებლები ბათუმის მერიას უყურადღებობაში ადანაშაულებენ.
მჭიდროდ დასახლებულ უბანში არც საკანალიზაციო და სანიაღვრე არხი არსებობს. შედეგად ფეკალიები ღია არხის მეშვეობით მდინარეში ჩაედინება. ქუჩაზე დღემდე არ დამონტაჟებულა გარე განათების სისტემაც. ადგილობრივები იმ დაპირებებს იხსენებენ, რომლებიც წინასაარჩევნო პერიოდში მაჟორიტარი დეპუტატების მხრიდან მრავლადაა.
ბათუმის მერიაში განმარტეს, რომ ქუჩის მოწესრიგება რამდენიმე დღეში დაიწყება. ტენდერის შედეგად კომპანია უკვე გამოვლენილია, რომელსაც მოსამზადებელი სამუშაოები უკვე დაწყებული აქვს. უწყების კეთილმოწყობის სამსახურში ირწმუნებიან, რომ ქუჩის მოსაფალტება ზაფხულამდე დასრულდება. პროექტი გარე განათების სისტემის, საკანალიზაციო და სანიაღვრე არხების მოწყობას არ ითვალისწინებს, ამ მიმართულებთ უწყებას ბიუჯეტში თანხები არ გაუთვალისწინებია.
ნიკო ჯაყელის ქუჩაზე მცხოვრებლები სანაგვე ურნების სიმცირესაც უჩივიან. ამბობენ, რომ ნაგვით სავსე კონტეინერები დროულად არ იცლება.