26, თებერვალი 2017 20:39:00
ცეცხლაურში ამ ტერიტორიაზე ნაგავსაყრელის მშენებლობა შესაძლოა აღარ დაიწყოს, ამის მიზეზი კი ადგილობრივთა პროტესტია. სოფლის მოსახლეობა შიშობს, რომ პროექტი ეკოლოგიაზე უარყოფით ზეგავლენას მოახდეს. თუმცა ირკვევა, რომ ისინი სრულყოფილ ინფორმაციას არ ფლობენ.
ცეცხლაურის ცენტრში დღეს ხალხმრავალი აქცია გაიმართა, სადაც რამდენიმე სოფლის მოსახლეობა შეიკრიბა. ადგილობრივები კომპენსაციების მიღებაზე უარს ამბობენ, შესაბამისად ისინი განსახლების ალბათობასაც გამორიცხავენ. ნაგავსაყრელის მშენებლობის არეალში საყანე ტერიტორიები და საცხოვრებელი სახლები ექცევა.
საპროტესტო აქციაზე ქობულეთის საკრებულოს დეპუტატებიც იმყოფებოდნენ. ისინი პრობლემის გადაჭრის ერთადერთ გზას მოლაპარაკებაში ხედავენ. უფლებადამცველი თამაზ ბაკურიძე ამბობს, რომ ვიდრე ნაგავსაყრელისთვის ტერიტორიას შეარჩევდნენ მოსახლეობასთან კომუნიკაცია არ შემდგარა.
საკითხზე აჭარის ფინანსთა და ეკონომიკის სამინისტროში კომენტარი არ გაკეთდა. უწყების პრესცენტრმა ქობულეთის გამეობაში გადაგვამისამართა, სადაც კონკრეტიკისგან თავს იკავებენ და განმარტავენ, რომ უახლოეს დღეებში რეგიონის მთავრობასა და ადგილობრივებს შორის მოლაპარაკება დაიწყება.
ცეცხლაურში ნაგავსაყრელის მშენებლობას აჭარის ფინანსთა და ეკონომიკის სამინისტროს შპს გეგმავს. შეგახსენებთ, რომ „ჰიგიენა 2009“-ის ყოფილი დირექტორი ამ ეტაპზე მიმალვაშია. ირაკლი ცეცხლაძეს ფინანსთა სამინისტროს საგამოძიებო სამსახური დიდი ოდენობით საბიუჯეტო თანხის მითვისებას ედავება. არაოფიციალური ინფორმაციით ეს თანხა 5 მილიონი ლარია, რომელიც ცეცხლაურში დაგეგმილი ნაგავსაყრელის მშენებლობას უნდა მოხმარებოდა.