20, სექტემბერი 2018 16:01:00
იუსუფ ფაღავას ქუჩაზე მცხოვრებლები მოსახლეობა გზის რეაბილიტაციას ითხოვენ. ადგილობრივები ხელისუფლებას უყურადღებობაში ადანაშაულებენ და აცხადებენ, რომ საკითხის მოგვარების მიზნით შესაბამის უწყებებს არაერთხელ მიმართეს, თუმცა უშედეგოდ.
მოუწესრიგებელი ინფრასტრუქტურის გამო, ადგილობრივებს პრობლემები ყოველდღიურად ექმნებათ. გზა მესამე წელია, რაც ავარიულია.
„წვიმის დროს, გზაზე გავლა ფაქტობრივად შეუძლებელია, მზიან ამინდში კი გზაზე მტვერია. ელემენტარულად, სახლიდან სამსახურამდე მოწესრიგებული მისვლა, შეუძლებელია. როდემდე უნდა ვიდგეთ ამ პრობლემის წინაშე?“- ამბობს ადგილობრივი თამაზ ხოზრევანიძე.
ბათუმის მერიაში განმარტეს, რომ ქალაქის ადმინისტრაციულ საზღვრებში მოქცეული მხოლოდ ქუჩაზე მდებარე სახლებია, საავტომობილო გზა კი ხელვაჩაურის მუნიციპალიტეტს ეკუთვნის, შესაბამისად უწყებაში ამტკიცებენ, რომ ინფრასტრუქტურის მოწესრიგება ხელვაჩაურის მერიის კომპეტენციაა.
ხელვაჩაურის მერიაში გვითხრეს, რომ გზების რეაბილიტაციის პროგრამა არ აქვთ, შესაბამისად პრობლემის მოგვარების მიზნით აჭარის საავტომობილო გზების დეპარტამენტს მიმართეს.
აჭარის საავტომობილო გზების დეპარტამენტში განმარტეს, რომ დასახლებაში საავტომობილო გზა მიწისქვეშა კომუნიკაციების მონტაჟის დროს დაზიანდა. დეპარტამენტის ინფორმაციით, აღნიშნულ სამუშაოებს ბათუმის მერია ახორციელებდა.
ცნობილია, რომ მიმდინარე წელს გზის რეაბილიტაცია არ იგეგმება, რადგან დეპარტამენტს ბიუჯეტის დაგეგმარების დროს საჭირო თანხები ამ მიმართულებით არ გაუთვალისწინებია. აქ გვარწმუნებენ, რომ პრობლემა სამომავლოდ მოგვარდება.
აღნიშნული თემის შესახებ „მაცნემ“ სიუჟეტი 2018 წლის 26 ივნისს მოამზადა, თუმცა პრობლემით დღემდე არცერთი უწყება არ დაინტერესებულა.
ხელისუფლებისგან მიტოვებული დასახლება ინფრასტრუქტურული პრობლემების ფონზე, როგორც ადგილობრივები ამბობენ, არც წინასაარჩევნოდ ახსენდებათ.
ფოტო: ქეთი დუმბაძე