11, იანვარი 2017 11:31:00
რესპუბლიკური კლინიკური ფსიქონევროლოგიური საავადმყოფო 2 მილიონ 5 ათას ლარად გაიყიდა. პირობიანი ელექტრონული აუქციონი რამდენიმე საათის წინ დასრულდა. ვინ გახდა აჭარის ავტონომიური რესპუბლიკის საკუთრებაში არსებული 100 %-იანი წილის მფლობელი ჯერჯერობით ცნობილი არ არის. ინფორმაცია მას შემდეგ გასაჯაროვდება, რაც ხელშეკრულება გაფორმდება, ამისთვის კი მხარეებს 30 კალენდარული დღე აქვთ. ხელშეკრულების გაფორმებიდან, ამავე ვადაში უნდა მოხდეს ნასყიდობის საფასურის გადახდაც. ფინანსთა და ეკონომიკის სამინისტრომ ქონება გასაყიდად ელექტრონულ პირობებიან აუქციონზე 100 000 ლარად გამოიტანა. მესამე სექტორის პროტესტისა და ცენტრალური მთავრობის მიერ გამოთქმული შენიშნვების შემდეგ, აუქციონის პირობები შეიცვალა. მყიდველს სამედიცინო (ფსიქიატრიული) პროფილის შენარჩუნება 10 წლის ნაცვლად, 50 წლის განმავლობაში დაევალა. ობიექტის მფლობელმა სარეაბილიტაციო სამუშაოები ხელშეკრულების გაფორმებიდან, 8 თვის ვადაში უნდა დაუწყოს და არაუგვიანეს 36 თვის ვადაში დაასრულოს. ობიექტის მოდერნიზებისა და თანამედროვე სტანდარტების ასამოქმედებლად 1 000 000 ლარის ინვესტიცია უნდა განხორციელდეს.