10, ოქტომბერი 2018 20:01:00
100 წლის ხანდაზმული ქობულეთიდან. ყოფილი მასწავლებელი, რომელმაც 70 წელზე მეტი პედაგოგიურ მოღვაწეობაში გაატარა, სახელმწიფომ ათასი ლარით დაასაჩუქრა. როგორ იხსენებს იმ პერიოდს ფატი მანელიშვილი და რას ურჩევს კოლეგებს?
ფატი მანელიშვილი დღის უმეტეს ნაწილს იმ ალბომის თვალიერებაში ატარებს, რომელიც მისი განვლილი ცხოვრების თითოეულ კადრს ასახავს. თვალებში, სევდასთან ერთად სიამაყეც იგრძნობა. განცდებს კი მისი სამოცდათერთმეწლიანი პედაგოგიური ღვაწლი იწვევს. საინტერესო ისტორია გასახსენებლად ბევრი აქვს. გვიყვება, რომ მისთვის მთავარი ჯანსაღად მოაზროვნე მოსწავლის აღზრდა იყო.
ფატი ბებოს დღეს 100 წელი შეუსრულდა. იხსენებს, რომ პროფესიის საოჯახო საქმეებთან შეთავსება მისთვის ხელშემშლელი გარემოება არასდროს ყოფილა. აქტიურად იყო ჩართული ლეღვაში სოფლის მეურნეობის განვითარებაში. სწორედ ფიზიკური აქტივობა და ჯანსაღი ცხოვრების წესი გახდა მისი ჯანმრთელობის წინაპირობა.
პროფესიით ქიმიკოსი დამწყებ და მოქმედ მასწავლებლებს ურჩევს, რომ აღსაზრდელებთან უფრო მეტი სიყვარული და მეგობრული დამოკიდებულება გამოიჩინონ, რადგან სწორედ ასეთი მიდგომით, ადამიანი პიროვნებად ყალიბდება.
100 წლის იუბილე დღეს მისმა მოსწავლემ მიულოცა. სერგო ართმელაძე გვიყვება, რომ სწორედ ფატი მანელიშვილია მისი ცხოვრების მთავარი მასწავლებელი.
ფატი მანელიშვილს 100 წლის იუბილე აჭარის ჯანდაცვის მინისტრმაც მიულოცა. ზაალ მიქელაძემ ხანდაზმულს სამინისტროს ერთ-ერთი პროგრამის ფარგლებში 1000 ლარიანი ვაუჩერი გადასცა.
დღეისათვის აჭარაში 100 წლის და 100 წელზე გადაცილებული 36 მოქალაქე ცხოვრობს. ყველა მათგანი ქალია.