17, ოქტომბერი 2018 14:11:00
ხულოს მუნიციპალიტეტის მერი 31 ოქტომრის ჩათვლით კუთვნილ შვებულებაშია - ამის შესახებ „TV 25“- ს უწყებაში განუცხადეს. კანცელარიის მიერ მოწოდებული ოფიციალური დოკუმენტის თანახმად, გოჩა მელაძე 15 დღით ანაზღაურებად შვებულებაშია.
დღეს დილით, სოციალურ ქსელში გავრცელდა ინფორმაცია, რომ ხულოს მერმა გოჩა მელაძემ თანამდებობა დატოვა. თავად ადრესატი ჩვენს სატელეფონო ზარებს და შეტყობინებებს არ პასუხობს.
"TV 25"-ს ხულოს მერიიდან ინფორმირებულმა წყარომ აცნობა, რომ მუნიციპალიტეტის მერი თანამდებობას ტოვებს. მერის მოვალეობას ახლა მოადგილე ლაშა ბოლქვაძე ასრულებს.
გოჩა მელაძის თანამდებობიდან წასვლის შესახებ ინფორმაცია არც უარყოფს და არც ადასტურებს მისი მოადგილე. ლაშა ბოლქვაძის თქმით, მოვალეობას ახლა თვითონ ასრულებს და მელაძის გადაწყეტილების შესახებ მას ინფორმაცია არ გააჩნია.
პროცედურების მიხედვით, ხულოს მერის თანამდობობიდან წასვლის შემთხვევაში, მუნიციპალიტეტში რიგგარეშე არჩევნები ჩატარდება. საარჩევნო კოდექსის მიხედვით, ხულოში, ახალი მერის არჩევნები მაისში უნდა გაიმართოს. ახალ მერს უფლებამოსილება მუნიციპალიტეტის საკრებულოს ვადის ამოწურვამდე ექნება.
რიგგარეშე არჩევნების ჩატარებამდე მერის უფლებამოსილებას კი მისი მოადგილე შეასრულებს.