19, ოქტომბერი 2018 14:10:00
„მაქვს პოზიტიური მოლოდინები“ - ამ ფრაზას ხულოს მერის მოვალეობის შემსრულებელი საუბრისას ყველაზე ხშირად იმეორებს. ვახტანგ ბერიძე ამბობს, რომ ვიდრე თანამდებობაზე დაინიშნებოდა მმართველ გუნდთან კონსულტაციები ჰქონდა, თუმცა ვისთან, არ აკონკრეტებს.
დღეს მისი პირველი სამუშაო დღეა. ხულოს მერიაში 12 საათზე გეგმავს მისვლას, თანამშრომლების გაცნობას და სამომავლო გეგმებზე აპირებს საუბარს. აღნიშნავს, რომ წინამორბედისგან კარგი მემკვიდრეობა დახვდა.
„გოჩა მელაძეს საკმაოდ კარგი პროექტები ჰქონდა, რომელიც აუცილებლად გაგრძელდება. მისი კარგი მუშაობის შედეგად საქმიანობა არ გამიჭირდება, ზოგადად მელაძე ეფექტური მმართველი იყო“ - ამბობს ვახტანგ ბერიძე.
ირწმუნება, რომ ყოფილ მერს თანამდებობა ზეწოლის შედეგად არ დაუტოვებია და ეს მისი პირადი გადაწყვეტილება იყო, რაშიც პრობლემას ვერ ხედავს. „მე ვიცი, რომ გოჩა მელაძე ჩვენი გუნდის წევრად რჩება, თუმცა სხვა რგოლში გააგრძელებს მუშაობას, უბრალოდ მან ჩათვალა საჭიროდ სხვაგან გაეგრძელებინა მუშაობა“ - აღნიშნავს ბერიძე.
მოლოდინი აქვს, რომ 28 ოქტომბრის საპრეზიდენტო არჩევნები ხულოს მუნიციპალიტეტში მშვიდ ვითარებაში ჩატარდება, ამის თქმის საფუძველს კი როგორც თავად ამბობს ხალხის განწყობა აძლევს. „ხულოში ხალხს დღევანდელი ხელისუფლება უყვარს და მათ ეს ცვლილებებიც მოწონთ“ - დასძენს ხულოს მერის მოვალეობის შემსრულებელი.
მერობის არჩევნებში მონაწილეობას აპირებს და პოზიტიური მოლოდინიც აქვს.
„მე ყოველთვის მაქვს ჩემი ხალხის იმედი, არ აქვს მნიშვნელობა სად ვიქნები, მე ყოველთვის ხულოს და ქვეყნის სამსახურში ვარ,“ - აცხადებს ვახტანგ ბერიძე.
ვახტანგ ბერიძე გასულ წელს შინაგან საქმეთა სამინისტროს ბათუმის სამმართველოს უფროსი მოადგილედ მუშაობდა, მოგვიანებით ხულოს პოლიციის უფროსად დანიშნეს.