23, ოქტომბერი 2018 21:11:00
ხმაურიანი აღმოჩნდა ბიუროს სხდომა უმაღლესს საბჭოში. კამათი უმცირესობისა და მმართველი გუნდის წევრებს შორის წინასაარჩევნოდ მიმდინარე პროცესებმა გამოიწვია. ელგუჯა ბაგრატიონმა ქობულეთის მერი საჯარო მოხელეებზე ზეწოლაში დაადანაშაულა. რის საფუძველზე დასდო ბრალი დეპუტატმა მუნიციპალიტეტის ხელმძღვანელს და რა უპასუხო მმართველმა გუნდმა?
დეპუტატის მტკიცებით, ქობულეთის მერმა მოადგილესთან ერთად სამსახურების უფროსები დაიბარა. ოპოზიციონერი წევრის განცხადებით მირიან ქათამაძე მათ დაემუქრა, იმ შემთხვევაში თუ ქართული ოცნების კანდიდატს მხარს არ დაუჭერდნენ, არჩევნების შემდეგ მათ სამსახურის დატოვება მოუწევდათ.
ქობულეთის მერმა დღეს ჩვენს სატელეფონო ზარებს არ უპასუხა. პრესცენტრში გვითხრეს, რომ უწყების ხელმძღვანელი საარჩევნო შეხვედრებზეა და მასთან დაკავშირებას ვერ მოახერხეს.
უმცირესობის წარმომადგნელის ბრალდებას უპასუხა მმართველი გუნდის წევრმა. ნინო ჩხეტია მსგავსი ფაქტების არსებობას გამორიცხავს.
ბიუროს სხდომაზე დღეს ფრაქციების და კომიტეტების თავმჯდომარეებმა დღის წესრიგით გათვალისწინებული სამი საკითხი განიხილეს. მათ შორის მოისმინეს განათლების ხელშეწყობის შესახებ აჭარის კანონში ცვლილებებზე ინფორმაცია. სიახლის შესახებ ვლადიმერ მგალობლიშვილმა ისაუბრა. საკითხს სამი მოსმენით უნდა უყარონ კენჭი.
დღესვე ბიუროს სხდომაზე მთავრობის სტრუქტურის და უფლებამოსილების შესახებაც იმსჯელეს. უმაღლესი საბჭოს თავმჯდომარემ საქვეუწყებო დაწესებულებების სამინისტროებთან შერწყმაზე ისაუბრა. დავით გაბაიძეის თქმით, ცვლილება პირველ იანვრამდე უნდა უნდა დამტკიცდეს.
დეპუტატებმა ბიუჯეტში ცვლილებების შეტანაზეც მოისმინეს ინფორმაცია. როგორც ცნობილი გახდა წარმომადგენლობითი ორგანოს თანამდებობრივი სარგო 11 208 ლარით მცირდება. ტრანსპორტის ექსპლუატაციიდან ეკონომიამ 30 ათასი ლარი შეადგინა, საიდანაც 10 ათასი დელეგაციების მასპინძლობის მუხლს ემატება. ცვლილება ოპოზიციის პროტესტის მიზეზი გახდა.
ბიუროს სხდომაზე განხილულ საკითხებზე დეპუტატები უახლოეს პლენარულ სხდომაზე იმსჯელებენ.