26, ოქტომბერი 2018 20:05:00
ოჯახი ხელვაჩაურიდან, რომელიც ყოველდღიურად საფრთხის წინაშე დგას. ცხოვრება მეწყერსაშიშ ზონაში დახმარების მოლოდინში. ხელვაჩაურის მერია ოჯახს განცხადების დაწერას ურჩევს
მსგავსი პრობლემა აქ ყოველი გაწვიმებისას იქმნება. სოფელ ნიკიტაურში მცხოვრები ოსანაძეების ოჯახში გვიყვებიან, რომ რისკები განსაკუთრებით ზამთრის პერიოდში იზრდება. უხვი ნალექის შედეგად ჩამოშლილი მიწის მასა სახლს აწვება და ნაგებობას აზიანებს.
პრობლემის მოგვარების მიზნით, ოსანაძეებმა განცხადებით ხელვაჩაურის მერიას ბოლოს, ერთი წლის წინ მიმართა, თუმცა რეაგირება ამ დრომდე არ მომხდარა. ისინი უწყებისგან ტერიტორიის გეოლოგიულ შემოწმებასაც ითხოვენ.
ოსანაძეები ყვებიან, რომ ძლიერი წვიმის დროს მიწის მასის ჩამოშლა ხშირ შემთხვევაში საავტომობილო გზასაც აზიანებს, სწორედ ამიტომ ოჯახი ფერდსამაგრი სამუშაოების ჩატარების აუცილებლობას ხედავს.
ხელვაჩაურის მერი ამბობს, რომ ოსანაძეების ოჯახმა უწყებას განმეორებით უნდა მიმართოს. განცხადების დაწერიდან ერთი კვირის ვადაში გეოლოგები ტერიტორიას შეისწავლიან.
ფერდსამაგრი სამუშაოების ჩატარებას ხელვაჩაურის მუნიციპალიტეტის მერია 90 პროცენტიანი თანადაფინანსებით უზრუნველყოფს. სამუშაოები მეწყერსაწინააღმდეგო ღონისძიებებისთის განკუთვნილი პროგრამის ფარგლებში განხორციელდება.