05, ნოემბერი 2018 20:03:00
არჩევნების მეორე ტურისთის მზადება აქტიურ ფაზაშია და რეგიონში დაბრუნების გადაწყვეტილება მთავრობის ყოფილმა თავმჯდომარემ მიიღო. უკავშირდება თუ არა ზურაბ პატარაძის მშობლიურ ქალაქში ჩამოსვლა მშობლიური პარტიის გაჭირვებას? როგორ ხსნის ყოფილი პირველი პირი ყველასთვის მოულოდნელ გამოჩენას?
ირწმუნება, რომ ხალხთან აქტიური კომუნიკაცია ჰქონდა და ახლაც იმავეს აგრძლებს. მშობლიურ ქალაქში მშობლიური პარტიის გასაჭირმა ჩამოიყვანა. აპირებს მმართველ გუნდს აგიტაციაში დაეხმაროს და საპრეზიდენტო არჩევნების მეორე ტურის წინ ამომრჩევლებთან აქტიური შეხვედრები გამართოს.
თანაგუნდელების მსგავსად იმეორებს დამკვიდრებულ ფრაზებს - იყო, არის და იქნება „ქართული ოცნების“ გუნდის წევრი და გულშემატკივარი. მხოლოდ პოზიციის შეცვლა მოუწია, მზადაა იქ იყოს, სადაც თანაგუნდელებს რაიმე ფორმით დახმარება დაჭირდება.
უჭირს იმის ახსნა თუ რამ განაპირობა მმართველი გუნდის მხარდაჭერილი დამოუკიდებელი კანდიდატის არჩევნებში არასასურველი შედეგი. ამ შემთხვევაშიც თანამოაზრეები პოზიციას იზიარებს და ამბობს, რომ ხალხთან მეტი კომუნიკაცია, მეტი ჩართულობა და მუშაობაა საჭირო.
მიაჩნია, რომ თორნიკე რიჟვაძე ღირსეულად აგრძელებს მუშაობას, თუმცა აჭარის მთავრობის თავჯდომარის მიერ დაწყებული პროექტები და კონკრეტული ინიციატივები არ დაუსახელებია. საკითხის კომენტირებისას ყურადღება მის მიერ დაწყებული ინფრასტრუქტურულ სამუშაოებზე გაამახვილა. თქვა, რომ მთვარია რიჟვაძეს მშენებლობის ტემპი არ შეუნელებია.
არც წასვლის დროს და არც ახლა აზუსტებს, რის გამო დატოვა თანამდებობა. გადაწყვეტილებაში ტრაგიკულს ვერაფერს ხედავს. ამბობს, რომ ახლა მნიშვნელოვან პოზიციაზე აგრძელებს მუშაობას და რეგიონს ინვესტიციების მოძიებაში დაეხმარება.
აჭარის მთავრობის ყოფილი მეთაური ახლა შვებულებაშია, ამ დროის განმავლობაში ზურაბ პატარაძე ქობულეთში ამომრჩევლებთან შეხვედრას ხვალიდან გეგმავს.