21, ნოემბერი 2018 20:36:00
არჩევნებამდე ერთი კვირით ადრე მესამე სექტორი ყალბი პირადობის მოწმობების დამზადების ფაქტებზე ალაპარაკდა. ფაქტით პროკურატურა უკვე დაინტერესდა, თუმცა ოპოზიციაში დაწყებულ გამოძიებას უნდობლობას უცხადებენ.
სამი გავლენიანი არასამთავრობო ორგანიზაციის მიერ გავრცელებული ინფორმაციით, რომლის მიხედვითაც არჩევნების მეორე ტურისთვის ყალბი პირადობის მოწმობები დაიბეჭდა, პროკურატურა დაინტერესდა. საერთაშორისო გამჭვირვალობა საქართველოს აღმასრულებელი დირექტორი საგამოძიებო უწყების კითხვებს თითქმის 4 საათის განმავლობაში პასუხობდა.
გამოძიებას წყაროს ვინაობა არც ახალგაზრდა იურისტთა ასოციაციის ხელმძღვანელმა დაუსახელა. ირმა პავლიაშვილის თქმით, უწყებას ის ინფორმაცია მიაწოდა, რომელიც საზოგადოებისთვის უკვე ცნობილია.
წყაროს შესახებ ინფორმაცია გამოძიებას „სამართლიანი არჩევნების" აღმასრულებელმა დირექტორმაც მიაწოდა. მიხეილ ბენიძე ამბობს, რომ ეს ადამიანი სერვისების განვითარების სააგენტოს თანამშრომელია და მან ინფორმაცია იუსტიციის სამინისტროში ჩატარებული თათბირის შემდეგ შეიტყო.
არასამთავრობოების შემდეგ, საგამოძიებო უწყებაში სერვისების განვითარების სააგენტოს ხელმძღვანელი და შიდა აუდიტის სამსახურის უფროსი ბეჟან ობგაიძეც მივიდნენ. მათი შეფასებით ბრალდებები უსაფუძვლო.
ოპოზიცია ყალბი პირადობის მოწმობების შესაძლო ბეჭვდის შესახებ პროკურატურაში დაწყებული გამოძიების ობიექტურობას ეჭვქვეშ აყენებს. ხელისუფლების ოპონენტები თვლიან, რომ “ქართული ოცნება” არჩევნების მეორე ტურის გაყალბებას ყველა ხერხით ცდილობს.
ბრალდება მიუღებელია მმართველი გუნდისთვის. ქართულ ოცნებაში დღესაც ამბობენ, რომ არასამთავრობო ორგანიზაციებმა ყალბი პირადობის მოწმობების ბეჭდვის შესახებ ინოფრმაცია - ფაქტების გარეშე გაავრცელეს, მათ მიერ წყაროს არდასახელება კი სწორედ ამ ინფორმაციის არასერიოზულოაზე მიუთითებს.
ინფორმაცია ყალბი პირადობების შესაძლო ბეჭვდის შესახებ გუშინ, 3-მა არასამთავრობო ორგანიზაციამ გაავრცელა. მათ წყარომ, რომელიც სახელმწიფო სერვისების განვითარების სააგენტოს თანამშრომელია უთხრა, რომ პირადობების ბეჭდვის პროცესს მაღალი თანამდებობის პირები და ამავე სააგენტოს შიდა აუდიტის სამსახურის უფროსი ხელმძღვანელობენ. მესამე სექტორის განცხადებას გუშინვე უპასუხეს სახელმწიფო სერვისების განვითარების სააგენტოში და არასამთავრობო ორგანიზაციები ცილისმწამებლური და უპასუხისმგებლო განცხადებების გამო გააკრიტიკეს. საქმეზე პროკურატურამ უკვე გამოძიება დაიწყო.