04, დეკემბერი 2018 20:23:00
მოხუცი, რომელიც მაღალმთიან აჭარაში მძიმე სოციალურ პირობებში ცხოვრობს. გაუსაძლისი მატერიალური მდგომარეობა, ავარიული სახლი და ჯანმრთელობის პრობლემები. დარეჯან შოთაძეს ყოველდღიურობასთან ბრძოლა მარტოხელას უწევს.
ქედის მუნიციპალიტეტის სოფელ ორცვაში მცხოვრებ დარეჯან შოთაძის ცხოვრება, რამდენიმე წლის წინ განვითარებულმა ტრაგიკულმა შემთხვევამ სრულიად შეცვალა. სამი შვილი გარდაეცვალა. შვილების დაკარგვის შემდეგ კი ოჯახის ერთადერთი წევრი - ქმარიც დაიღუპა, ახლა, ქედის მუნიციპალური ცენტრიდან, რამდენიმე კილომეტრით დაშორებულ სოფელში, ავარიულ სახლში მარტო ცხოვრობს.
მარტოხელა მოხუცის რთულ სოციალურ ფონს, მატერიალური ყოფა უფრო ამძიმებს. თავს იმ პენსიით ირჩენს, რომელსაც სახელმწიფო მას, როგორც ქმედუუნაროს უხდის. ოჯახის ერთადერთი შემოსავლით - პენსიით პირველად იმ წამლებს ყიდულობს, რომელიც სიცოცხლისთვის აუცილებელია და თუ თანხა რჩება, პურის ფქვილს, მაკარონს, ზეთსა თუ შაქარს იმარაგებს. ამბობს, რომ ჯანმრთელობასთან ერთად, მისი მთავარი საფიქრალი ახლა საცხოვრებელი სახლია. შიშობს ერთ დღესაც ჩამოინგრევა და მისი ცხოვრების ტრაგიკული ისტორიაც ასე დასრულდება.
ზამთრისთვის წამლები და სათბობი შეშა მომარაგებული აქვს, თუმცა პენსიით ნაყიდ შეშას ეკონომიურად მოიხმარს, რადგან იცის რომ წინ ცივი და ხანგრძლივი ზამთარი ელოდება.
შეისწავლა თუ არა მერიამ მარტოხელა მოხუცის საცხოვრებელი სახლის მდგრადობა და რატომ არ დაეხმარა სათბობი შეშით ადგილობრივი ხელისუფლება მარტოხელას, მაშინ, როდესაც ამის რესურსი გააჩნდა? რას აკეთებს მუნიციპალიტეტი მარტოხელა მოხუცებისთვის მერის მოადგილე კითხვას ასე პასუხობს:
სოციალური მომსახურების ქედის ფილიალის ინფორმაციით, ამ ოჯახს დახმარება 2015 წლის ზაფხულში ხელახალი გადამოწმების დროს მოეხსნა. მარტოხელა უხუცესი ქალის ოჯახური მდგომარეობა სოციალური მომსახურების სააგენტომ ბოლოს, მიმდინარე წლის აგვისტოში შეისწავლა და 78 960 ქულით შეაფასა, რითაც ხელისუფლებამ კიდევ ერთხელ უარი უთხრა ფულად დახმარებაზე.
სოციალური მომსახურების ქედის ფილიალში აღნიშნულთან დაკავშირებით კომენტარის გაკეთება არ ისურვეს, აქ მხოლოდ ის გვითხრეს, რომ ოჯახს განმეორებით მაშინ შეისწავლიან, თუ სოციალური მომსახურების აჭარის სამსახურიდან წერილობით მოთხოვნას მიიღებენ. გაითვალისწინებს თუ არა სოციალური მომსახურების სააგენტოს აჭარის სამსახური, მთაში მცხოვრები მარტოხელა მოხუცის მდგომარეობას და მოითხოვს თუ არა განმეორებით შესწავლას ეს მათ სურვილზეა დამოკიდებული, მანამდე უხუცესი ქალი ცხოვრებას, ავიარულ სახლში ისევ პენსიითა და ქველმოქმედი ადამიანების იმედად გააგრძელებს.
სიუჟეტი მომზადებულია ამერიკის საელჩოს ფინანსური მხარდაჭერით. თ გჭრდება ჟრნალისტის დახმარება, დარეკე ნომერზე 579 34 24 24