12, დეკემბერი 2018 20:33:00
ელექტროენერგიის მოძველებული ბოძები და ცხოვრება საფრთხის ქვეშ. ჭარნალში მცხოვრებლები ხელისუფლებას მიმართავენ. ხელვაჩაურელები ელექტროგადამცემი სისტემის შეცვლას ითხოვენ. მოუგვარებს თუ არა პრობლემას ჯუმბერ ვარდმანიძე მოქალაქეებს ?
ეს ბოძი შესაძლოა ნებისმიერ დროს წაიქცეს. ელექტროგადამცემი სისტემა წლებია გადახრილი და დაზიანებულია. სწორედ ამის გამო სოფელ ჭარნალში მცხოვრებლები შიშობენ, რომ მათ სიცოცხლეს საფრთხე ემუქრება.
ელექტროგადამცემი ხის ბოძების შეცვლას ჭარნალში მცხოვრებლები წლებია ითხოვენ. ყვებიან, რომ 30 წელია, სისტემა არ შეცვლილა. დახმარებისთვის სოფლის ხელმძღვანელობას არაერთხელ მიმართეს, თუმცა უშედეგოდ.
ხელვაჩაურის მერის წარმომადგენელი სოფელ ჭარნალში ჩვენთან სატელეფონო საუბარში ირწმუნება, რომ პრობლემის მოსაგვარებლად გარკვეული ნაბიჯები უკვე გადადგა. ნუგზარ აბაშიძის თქმით, ბოძები შეძენილია და მონტაჟს უახლოეს მომავალში დაიწყებენ.
საპირისპიროს ამტკიცებენ „ენერგო - პრო ჯორჯიაში“. კომპანიის მენეჯმენტში განმარტეს, რომ მათ არავინ დაკავშრებია. მას შემდეგ, რაც „მაცნე“ საზოგადოებასთან ურთიერთობის სამსახურს დაუკავშირდა, სპეციალისტებმა ვითარება ადგილზე შეისწავლეს.
„ენერგო პრო ჯორჯიაში“ განაცხადეს, რომ შესაბამისი დასკვნის დადების შემდეგ კომპანია, სოფელში საჭირო სამუშაოებს განახორციელებს.