14, იანვარი 2019 17:03:00
ბათუმში, ქართული თეატრის დღე აღინიშნა. ღონისძიებების ფარგლებში თეატრის თანამშრომლები დააჯილდოვეს. აჭარის მთავრობის თავმჯდომარემ თეატრალურ საზოგადოებას პროფესიული დღე მიულოცა და მათ მადლობის სიგელები გადასცა. ქართული პროფესიული თეატრი დააარსა და მისი იდეური, შემოქმედებითი მრწამსი პოეტმა და დრამატურგმა გიორგი ერისთავმა განსაზღვრა. პირველი წარმოდგენა 1850 წლის 14 იანვარს გაიმართა, თბილისის გიმნაზიის სააქტო დარბაზში, სცენისმოყვარეთა ძალებით, ერისთავის რეჟისორობითა და მონაწილეობით წარმოადგინეს მისივე პიესა "გაყრა". ეს თარიღი მიჩნეულია ქართული თეატრის აღდგენის თარიღად და XIX საუკუნის 80-იანი წლებიდან აღინიშნება, როგორც ქართული თეატრის დღე.