18, იანვარი 2019 20:07:00
მიუხედავად იმისა, რომ პორტის ადმინისტრაციამ ტერიტორიაზე ახალი ტერმინალის მშენებლობის დაწყების ხელშეკრულება უკვე გააფორმა, მოქალაქეების პროტესტი არ წყდება. ბათუმელები დაგეგმილ პროექტს ეწინააღმდეგებიან. საფრთხეებს რამდენიმე მიმართულებით ხედავენ. რა აშინებთ ადგილობრივებს ?
ალექსანდრე თევზაძე იმ საფრთხეზე საუბრობს, რასაც მისი თქმით, ბათუმში, მინერალური სასუქების ტერმინალის მშენებლობა გამოიწვევს. ირწმუნება, რომ ტერიტორიაზე კარბამიდთან ერთად, ამონიუმის ნიტრატის დასაწყობებაც მოხდება.
საინიციატივო ჯგუფ ,,ქიმიური შეტავა ბათუმზე“ წევრი მიიჩნევს, რომ ახალი ტერმინალის მშენებლობა როგორც ეკონომიკური, ისე ადამიანის სიცოცხლის უსაფრთხოების კუთხით, დამღუპველია. იმ შემთხვევაში კი, თუ პროექტი მაინც განხორციელდება, თევზაძე ქალაქს, მსოფლიო ტურისტული რუქიდან გაქრობას უწინასწარმეტყველებს.
სპეციალისტებისგან უკვე მოისმინა განმარტება, რომ კარბამიდი არ არის მავნებელი, თუმცა პროფესიით ექიმი ზეინაბ დიასამიძე, მათ მოსაზრებას არ ეთანხმება. ამბობს, რომ ქიმიური მრეწველობისა და სასუქების წინააღმდეგი არა არის, თუმცა მნიშვნელოვან ყურადღებას უსაფრთხოებაზე ამახვილებს. სამოქალაქო აქტივისტს პრეტენზიები ხელისუფლებასთან აქვს და მათგან გარემოზე ზემოქმედების რისკების ობიექტურ გამოკვლევას ითხოვს.
პროექტის მიხედვით, დაგეგმილია მინერალური სასუქების ტერმინალის მშენებლობა გრანირებული კარბამიდის გადატვირთვის მიზნით. ქიმიის მეცნიერებათა დოქტორი იმ ნორმებზე საუბრობს, რომლის დაცვაც აუცილებელია. ვლადიმერ ციციშვილი მიიჩნევს, რომ საზოგადოებაში
ტერმინალის ირგვლივ არსებულ პანიკურ შიშს, ამ ეტაპზე საფუძველი არ აქვს.
მულტიმოდალურ ტერმინალს ამერიკული კორპორაცია ,,trammo” და ,,wondernet express” ააშენებს. ინვესტორები ობიექტის მშენებლობისა და ექსპლუატაცის პროცესში, გარემოზე ზემოქმედების რისკებს გამორიცხვენ. პროცესში ეკოლოგიურ რისკებს საქართველოს მთავრობაც გამორიცხავს.
ტერმინალის მშენებლობის დაწყებამდე კომპანიამ გარემოზე ზემოქმედების შეფასების დოკუმენტი უნდა მოამზადოს. პროექტის წინააღმდეგ კი 20 იანვარს, ბათუმში, კიდევ ერთი მასშტაბური საპროტესტო აქციაა დაანონსებული.