13, მარტი 2019 20:05:00
თუ აფხაზური ენის სწავლას გადაწყვეტთ, პროცესში ის სახელმძღვანელო დაგეხმარებათ, რომლის პრეზენტაცია დღეს გაიმართა. „აფხაზური ენა დამწყებთათვის“, - წიგნი აფხაზეთის მთავრობის ინიციატივით შეიქმნა. რამდენად მოთხოვნადია ენის შესწავლა და რამდენად სახელმძღვანელო პედაგოგებს და მოსწავლეებს?
ფერიის საჯარო სკოლის პედაგოგი მოსწავლეებს ენას, სწორედ ამ ახალი სახელმძღვანელოს მეშვეობით შეასწავლის. ეს არის ერთ-ერთი სკოლა აჭარაში, სადაც აფხაზური ენა ისწავლება. დღემდე პედაგოგი, შესასწავლ მასალებს თავისი ძალებით იძიებდა.
„აფხაზური ენა დამწყებთათვის“, - სწორედ ამ სახელწოდების სახელმძღვანელო, აფხაზეთის ავტონომიური რესპუბლიკის მთავრობის ინიციატივით შეიქმნა. ვახტანგ ყოლბაია იმედოვნებს, რომ წიგნი მხარეებს შორის მშვიდობის ხიდის აგებაში, მნიშვნელოვან წვლილს შეიტანს.
აფხაზურ ენას აჭარაში ფერიის გარდა, ბათუმის მე 14 -ე საჯარო სკოლაში ეუფლებიან. აფხაზური ჯგუფებისთვის სპეციალური კლასია მოწყობილი და იგი უზრუნველყოფილია აფხაზური ენის სახელმძღვანელოებით. თითოეული ჯგუფისთვის გაკვეთილები კვირაში 4 საათი ტარდება, სახელმძღვანელობით კი განათლების ფონდი ამარაგებთ. პირველ ეტაპზე აჭარაში, საგანმანათლებლო დაწესებულებებს 100 სახელმძღვანელო გადაეცემა.
აჭარის მთავრობის თავმჯდომარე, ახალ სახელმძღვანელოს, აფხაზებსა და ქართველებს შორის ურთიერთობის გამყარების წინაპირობად მიიჩნევს.
აფხაზური ენა, ადიღურ ენათა ჯგუფს მიეკუთვნება. ანბანი კი, 64 ასობგერისგან შედგება. აჭარაში, აფხაზური ენის შესწავლა 2017 წელს დაიწყო. ბათუმის შოთა რუსთაველის სახელმწიფო უნივერსიტეტში შემუშავდა აფხაზური ენის სწავლების პროგრამა, შესაბამისად ენა ჩასმულია არჩევით საგნებში. აფხაზური ენის დღე 27 ოქტომბერს აღინიშნება.