ქალაქში სავარაუდოდ უპატრონო ძაღლებს ხოცავენ. ლეშს კი ნაგავსაყრელთან ე.წ. ბეიკერის ორმოში ყრიან. ფაქტის ამსახველი კადრები ტვ 25-ს მოქალაქემ მიწოდა, რომელიც საკითხზე საჯაროდ იმის შიშით არ საუბრობს, რომ პოლიციამ დაკითხვაზე დაიბარა. ფაქტის მოკვლევა სამართალდამცავმა უწყებამ დაიწყო.
ეს ვიდეო ქალაქის მთავარი ნაგავსაყრელის მიმდებარე ტერიტორიაზეა გადაღებული. ვიდეოს ავტორის მტკიცებით, ქალაქის ტერიტორიაზე დაჭერილ მიუსაფარ ცხოველებს ხოცავენ და ამ ადგილას, მოწყობილ ე.წ ბეიკერის ორმოში ყრიან. მოქალაქის ინტერვიუზე დათანხმება იმის გამო ვერ შევძელით, რომ მას მუქარის ეშინია. მისივე ინფორმაციით, მაწანწალა ძაღლები ნაგავსაყრელთან თეთრი მიკროავტობუსით ღამით მიყავთ.
თითქმის ანალოგიური მოსაზრება აქვთ ორგანიზაციაში, სადაც ცხოვლეთა უფლებებს იცავენ. თემურ ნაჭყებია, მოქალაქეებზე დაყრდნობით ირწმუნება, რომ ბათუმის ტერიტორიაზე მიუსაფარ ძაღლებს ღამით, მერიის დავალებით იჭერენ და თავშესაფარში მიყვანის გარეშე კლავენ. არასამთავრობო ორგანიზაციის ხელმძღვანელი სტანდარტების დარღვევაზე და დაუცველ ჰიგიენურ ნორმებზეც საუბრობს.
ბათუმის ნაგავსაყრელი ბოლო წლებია, რაც უკანონოდ ფუნქციონირებს. შესაბამისად ტერიტორიაზე მოწყობილი ბეიკერის ორმოც უკანონონოა. გარემოსდამცველი თვითმართველობის ვალდებულებაზე ამახვილებს ყურადღებას და აცხადებს, რომ სატენდერო პირობებში კანონით არსებული რეგულაციებიც უნდა გათვალისწინებულიყო.
მას შემდეგ, რაც მოქალაქემ „TV 25“-ს ფაქტის ამსახველი ვიდეო მასალა მიაწოდა ტერიტორიაზე კომპანია „სევერის“ წარმომადგენელი მივიდა. ჯემალ გოგიტიძემ დაადასტურა, რომ ბეიკერის ორმო ნამდვილად მათ ეკუთვნით. მისივე მტკიცებით, აქ მხოლოდ დაძინებულ ცხოველებს ათავსებენ. ამბობს, რომ ვიდეო მასალა, რომელიც მოქალაქემ გაავრცელა პროვოკატორია.
კომპანია სევერში ირწმუნებიან, რომ მიუსაფარ ცხოველებს შესაბამისი დასკვნის შემდეგ აძინებენ. ვეტერინარი ასეთ გადაწყვეტილებას მას შედეგ იღებს, თუ ცხოველი აგრესიასთან ერთად, ადამიანებისთვის საფრთხეს წარმოადგენს. წელს, თავშესაფარში 600-ზე მეტი მაწანწალა ძაღლები შეიყვანეს, აქედან ევთანაზიას მხოლოდ 70 დაექვემდებარა.
ფაქტის შესწავლა შინაგან საქმეთა სამინისტრომ დაიწყო. როგორც უწყებაში განაცხადეს, ეს ტერიტორია მკვდარი უპატრონო ძაღლების სამარხად ოფიციალურად არის გამოყოფილი. თემაზე ბათუმის მერიაში კომენტარი არ გაკეთდა.
7
s
s
s