24, მარტი 2017 17:09:00
კიდევ ერთი გადაწყვეტილება ყოფილი საჯარო მოხელის სასარგებლოდ. ბათუმის საქალაქო სასამართლომ აჭარის განათლების სამინისტროს ყოფილი თანამშრომლის სარჩელი დააკმაყოფილა. მოსამართლე ჯუმბერ ბეჟანიძის გადაწყვეტილებით უწყებამ რომან დოლაბერიძეს ნაცდურის სახით გათავისუფლებული დროის ხელფასი, თვიურად 1 100 ლარი უნდა აუნაზღაუროს და თანამდებობაზე აღადგინოს. დოლაბერიძე აჭარის განათლების სამინისტროში 2010 წლიდან სხვადასხვა თანამდებობაზე მუშაობდა, 2013-2016 წლებში საზოგადოებასთან ურთიერთობის დეპარტამენტის მთავარი სპეციალისტის პოზიცია ეკავა. იგი გასული წლის აპრილში ყოფილმა მინისტრმა გიორგი თავამაიშვილმა სამსახურეობრივი მოვალეობის არაჯეროვნად შესრულების გამო დაითხოვა. კონკრეტულად კი საქმე ეხება უწყების მონაცემთა ბაზიდან ფაილების დაკარგვას. დოლაბერიძის მტკიცებით, მას აღნიშნულთან კავშირი არ ჰქონია და პოლიტიკური ნიშნით, მინისტრის ყოფილ მოადგილე ვლადიმერ მგალობლიშვილთან პირადი კონფლიქტის გამო დაითხოვეს. სასამართლოს დღევანდელ გადაწყვეტილებას არ ეთანხმებიან აჭარის განათლების სამინისტროში. იურისტის განცხადებით განაჩენს სააპელაციო სასამართლოში გაასაჩივრებენ.