კახა მიქელაძე და ირაკლი აბუსერიძე გირაოთი გაათავისუფლეს.სასამართლომ კახა მიქელაძე 2000 ლარი გირაოს, ხოლო ირაკლი აბუსერიძე 3000 ლარის სანაცვლოდ გაათავისუფლა. ისინი მას შემდეგ დატოვებენ საპატიმრო დაწესებულებას, როცა გირაო უზრუნველყოფილი იქნება.
ალექსანდრე თევზაძის მტკიცებით, 21 ივნისს იყო მისი გატაცების მცდელობა და უმაღლესი საბჭოს ყოფილი დეპუტატი, კახა მიქელაძე მას ფიზიკურად მანქანაში გაუსწორდა. მისივე თქმით, ამ დროს დაჭრა მძღოლმა – ირაკლი აბუსერიძემ ხანჯლით თავისა და ხელის არეში.
ბრალდებულების ახლობლების მტკიცებით კი, კონფლიქტი ფეისბუქში ალეკო თევზაძის საჯარო პოსტმა გამოიწვია, რითაც კახა მიქელაძეს შეურაცხყოფა მიაყენეს. ახლობლების თქმით, ალეკო თევზაძის გატაცებას არავინ აპირებდა.
ბრალდებულები ბათუმში 24 ივნისს დააკავეს. მათ გამოძიება სისხლის სამართლის კოდექსის 239-ე მუხლის მე-2 და მე-3 ნაწილების მიხედვით ედავება, რაც ხულიგნობის ჯგუფურად ჩადენას გულისხმობს.
გამოძიებას პროკურატურამ კვალიფიკაცია შეუცვალა. კახა მიქელაძეს პროკურატურა ამჯერად 126-ე მუხლით ედავება, რაც ფიზიკურ ძალადობას გულისხმობს, ირაკლი აბუსერიძეს კი 120-ე მუხლით, რაც ჯანმრთელობის განზრახ მსუბუქ დაზიანებას გულისხმობს.
დღეს მოსამართლე ვიოლეტა ფორჩხიძემ უმაღლესი საბჭოს ყოფილ დეპუტატს, კახა მიქელაძეს უთხრა, რომ მას ბრალის დადასტურების შემთხვევაში ელის ჯარიმა, საზოგადოებისთვის სასარგებლო შრომა, შინაპატიმრობა, ან ერთ წლამდე თავისუფლების აღკვეთა.
მოსამართლემ მეორე ბრალდებულს, ირაკლი აბუსერიძეს განუმარტა, რომ ამ შემთხვევაში ბრალდებულს შესაძლოა 3 წლამდე შეუფარდონ თავისუფლების აღკვეთა.
ბრალდებულების გირაოს საფუძველზე გათავისუფლება თავად პროკურორმა თორნიკე გოგეშვილმა მოითხოვა, რასაც ადვოკატიც დაეთანხმა.
73
s
s
s