02, აგვისტო 2019 22:44:00
10 აგვისტოს აჭარაში, პეტრას ციხეზე დაგეგმილი ელექტრონული მუსიკის ფესტივალი სხვა ლოკაციაზე ჩატარდება. ორგანიზატორების განმარტებით, ამის მიზეზი ადგილობრივი მოსახლეობისა და სასულიერო პირების პროტესტია.
GR Fest-ის ორგანიზატორების თქმით, მიიღეს 160-მდე პირის ხელმოწერილი წერილი, რომლებიც ირწმუნებიან, რომ "კაზანტიპის მსგავს" ფესტივალს არ ჩაატარებინებენ და "წმინდა მიწას ამორალური და ანტიმართლმადიდებლური" ქმედებისგან დაიცავენ.
ორგანიზატორები ამბობენ, რომ პეტრას ციხეზე ღონისძიების ჩატარებაზე აჭარის კულტურული მემკვიდრეობისა და ძეგლთა დაცვის სააგენტოსგან წერილობითი თანხმობა აქვთ, მაგრამ ესკალაციის თავიდან ასაცილებლად ლოკაციის შეცვლაზე მოლაპარაკებებს აწარმოებენ. მათი თქმით, ფესტივალის გამართვის თარიღი და შემსრულებლების სია უცვლელია.
ეს პირველი შემთხვევა არ არის, როდესაც რეგიონში ადგილობრივი მოსახლეობა ფესტივალის ჩატარებას აპროტესტებს. 24 ივნისს ყაზბეგში ადგილობრივმა მოსახლეობამ Mountain Set: Kazbeg-ს საფესტივალო ტერიტორია დაარბია. მიზეზი ამ შემთხვევაშიც იგივე იყო.
წყარო: ON.GE