12, აგვისტო 2019 11:37:00
სოფელ გუგუტიანთკარში ბარიერის მშენებლობა შეჩერებულია. დღეს ადგილზე აღარ გამოჩენილან რუსი სამხედროები. შესაბამისად იქ არც ე.წ. ბორდერიზაციის პროცესი განახლებულა.
ადგილზე 24-საათიან რეჟიმში იმყოფებიან ქართველი სამართალდამცველები და მონიტორინგს უწევენ მიმდინარე პროცესებს.
აგვისტოს ომიდან 11 წლისთავზე, 7 აგვისტოს, საოკუპაციო რეჟიმმა ხელოვნურ საზღვრების გავლება განაახლა. აღნიშნულთან დაკავშირებით საგარეო უწყებამ შესაბამისს ზომებს მიმართა, მათ შორის ცხელი ხაზის ამოქმედებისა და ჟენევის კომისიის საქმის კურსში ჩაყენებით, რის შემდეგაც ე.წ. ბორდერიზაციის პროცესი შეჩერდა.
მომხდარ ფაქტზე მხარეები 29 აგვისტოს ერგნეთში, ინციდენტების პრევენციისა და მათზე რეაგირების მექანიზმის ფარგლებში მორიგ სამუშაო შეხვედრაზე იმსჯელებენ.