შაბათი 21, სექტემბერი 2019

ბორჯღალოსნები მსოფლიო თასისთვის გახურებას სამხრეთ აფრიკელებთან იწყებენ

27, აგვისტო 2019 13:45:00

რაგბის გულშემატკივრებისთვის ნანატრი დღე ახლოვდება. 2019 წლის მსოფლიო თასის დაწყებამდე ერთ თვეზე ნაკლები რჩება.

საქართველოს ნაკრებმა ცოტა ხნის წინ მზადების მესამე ეტაპი დაიწყო, ხოლო სამშაბათს გასახურებელ მატჩებშიც ჩაებმება და სერიას "საუზერნ კინგსთან" დაპირისპირებით გახსნის, რომელსაც ჩვენი გუნდი "მიხეილ მესხზე" დაუხვდება.

"ბორჯღალოსნები" მსოფლიო თასზე მეხუთედ იასპარეზებენ, თუმცა პირველად ხდება, რომ გასახურებელ ტესტ-მატჩებს საკუთარ მოედანზე მართავენ. ამ მომენტისთვის მილტონ ჰეიგის განკარგულებაში 36 მორაგბეა, საიდანაც ხუთი ამოვარდება და იაპონიაში 31 მოთამაშე გაემგზავრება. ხვალინდელ მატჩში 23-ის ნაცვლად, გუნდებს განაცხადში 26 მორაგბე ეყოლებათ, რადგან მატჩი მოსამზადებელ ხასიათს ატარებს და ბევრი მოთამაშის გამოცდა ორივე მხარეს აწყობს.

მილტონ ჰეიგმა ექსპერიმენტული შემადგენლობა აირჩია: ახალგაზრდა და გამოცდილი მოთამაშეების ნაზავი, რომელთაგან ზოგი ძირითადის მოთამაშედ მოიაზრება, ზოგიც რეზერვის, ხოლო რამდენიმე მოთამაშის ბედი ჯერ კიდევ გადასაწყვეტია და ეს მატჩი მათთვის ბევრს ნიშნავს, რადგან აქვთ შესაძლებლობა, სამწვრთნელო შტაბს დაუმტკიცონ, რომ იაპონიაში გამგზავრებას იმსახურებენ.

ახალზელანდიელმა სპეციალისტმა პირველი ხაზი ახალგაზრდა მორაგბეებით დააკომპლექტა: მარცხენა ბურჯი გურამ გოგიჩაშვილი (20 წლის), კვაჭი ვანო კარკაძე (19 წლის) და მარჯვენა ბურჯი გიორგი მელიქიძე (23 წლის). მეორე ხაზში გამოცდილი მორაგბეები ლაშა ლომიძე და გიორგი ნემსაძე ითამაშებენ, ხოლო მესამე ხაზში ბექა საღინაძე, გიორგი ცუცქირიძე და ოთარ გიორგაძე იასპარეზებენ. დღევანდელი გადმოსახედით, ზემოხსენებული მორკინალებიდან მსოფლიო თასისთვის ძირითადის მოთამაშეებად ნემსაძე, ცუცქირიძე და გიორგაძე მოიაზრებიან.

რაც შეეხება უკანა ხაზს, ღერძზე გიორგი ბეგაძის და ლაშა ხმალაძის გამოცდილი დუეტი გაირჯება, ფრთებზე მირიან მოდებაძე და გიორგი აფციაური იქნებიან გამწესებულნი, შუამარბებად კაპიტანი მერაბ შარიქაძე და ზურაბ ძნელაძე მოგვევლინებიან, ხოლო ფულბექის პოზიციას სოსო მათიაშვილი დაიკავებს.

როგორც ცნობილი გახდა, მილტონ ჰეიგი მსოფლიო თასის 31-კაციან განაცხადს შოტლანდიასთან საშინაო მატჩის შემდეგ დაასახელებს.

მილტონ ჰეიგი: „ჯერ ამ თამაშებში და შემდეგ მსოფლიო თასზე უნდა გამოჩნდეს ის სამუშაო, რაც უკანასკნელი 4 წლის განმავლობაში გავწიეთ. ‘საუზერნ კინგსთან’ და შოტლანდიის ნაკრებთან იმ ტაქტიკურ სიახლეებს გამოვცდით, რომელთა გამოყენებასაც მსოფლიო თასზე ვაპირებთ. საბედნიეროდ, ტრავმა არავის აწუხებს და მომავალი შეხვედრისთვის ყველა მაქსიმალურად მობილიზებული ემზადება“.

მერაბ შარიქაძე: „მომავალი მეტოქე ძალიან კარგი გუნდია, რომელიც კარგ ჩემპიონატში ასპარეზობს. მისი ძლიერი მხარე ხელით თამაშია, განსაკუთრებით კონტრშეტევებისას. როგორც კი რუსეთთან თამაში გაუქმდა ვთქვი, რომ ბევრად უკეთესი იქნებოდა თუ ძლიერ კლუბს შევხვდებოდით. რუსეთის ნამდვილი სახე იტალიასთან ვნახეთ და ‘საუზერნ კინგსთან’ შეხვედრა, რეალურად უფრო მეტის მომცემი იქნება. ამ გუნდს ზუსტად ის სათამაშო სტილი აქვს, რაშიც საკუთარი თავის გამოცდა გვინდა, რასაც უნდა ველოდოთ ფიჯისგან, უელსისგან, ავსტრალიისგან და ურუგვაისგან. ამ თამაშით საუკეთესო გამოცდილებას მივიღებთ“.

საქართველოს ნაკრების შემადგენლობა

უკანა ხაზი

15. სოსო მათიაშვილი, 14. მირიან მოდებაძე, 13. ზურაბ ძნელაძე, 12. მერაბ შარიქაძე (კაპ.), 11. გიორგი აფციაური, 10. ლაშა ხმალაძე, 9. გიორგი ბეგაძე;

შერკინება

1. გურამ გოგიჩაშვილი, 2. ვანო კარკაძე, 3. გიორგი მელიქიძე, 4. ლაშა ლომიძე, 5. გიორგი ნემსაძე, 6. ბექა საღინაძე, 7. გიორგი ცუცქირიძე, 8. ოთარ გიორგაძე. 

მარქაფა

16. გიორგი ჭყოიძე, 17. კარლენ ასიეშვილი, 18. ლევან ჩილაჩავა, 19. კოტე მიქაუტაძე, 20. გიორგი თხილაიშვილი, 21. შალვა სუთიაშვილი, 22. გელა აფრასიძე, 23. ლაშა მალაღურაძე, 24. ალექსანდრე თოდუა, 25. თამაზ მჭედლიძე, 26. დავით კაჭარავა.

"საუზერნ კინგსს" ჯერჯერობით შემადგენლობა არ გამოუქვეყნებია, მაგრამ ის ცნობილია, რომ თბილისს საკმაოდ ძლიერი შემადგენლობით ეწვია და ამ მატჩს პრო 14-ის ახალი სეზონის მზადებისათვის სერიოზულ ნაწილად განიხილავენ.

ავტორი(ები)

124

დღის ამბები