ყირიმ-კონგოს ცხელებით ასპინძაში მცხოვრები 30 წლის კაცი გარდაიცვალა. როგორც დაავადებათა კონტროლის ეროვნულ ცენტრში განაცხადეს, პაციენტი ასპინძაში დაავადდა, რის შემდეგაც იგი თბილისში, ინფექციურ საავდმყოფოში გადაიყვანეს, თუმცა დაავადების სიმძიმიდან გამომდინარე, მისი გადარჩენა ვერ მოხერხდა.

„ეს ადამიანი ასპინძაში დაავადდა, გარდაცვალება კი თბილისში, სამედიცინო დახმარების გაწევის შემდგომ მოხდა. ასპინძა, ისევე, როგორც სამცხე-ჯავახეთი, შიდა ქართლი, საქართველოს კიდევ რამდენიმე რეგიონი ენდემურია ამ დაავადებისთვის და ფიქსირდება ეს შემთხვევები. სამწუხაროდ, ეს არის უმძიმესი დაავადება, რომელიც ზოგ შემთხვევაში ლეტალურად მთავრდება“, – აღნიშნა დაავადებათა კონტროლის ეროვნული ცენტრის გადამდებ დაავადებათა დეპარტამენტის უფროსმა, ხათუნა ზახაშვილმა.

ცნობისთვის, წელს, ზაფხულისა და შემოდგომის თვეებში ყირიმ-კონგოთი დაავადდა ექვსი და გარდაიცვალა სამი ადამიანი.