30, სექტემბერი 2019 11:40:00
პრაქტიკოს მასწავლებელთა ეროვნული ჯილდოსთვის ბიუჯეტიდან 75 მილიონი ლარი, ხოლო ხელფასების 150 ლარით ზრდისთვის 20 მილიონი ლარი გამოიყოფა. 2019 წლის ბიუჯეტში შესაბამისი ცვლილებების პროექტი პარლამენტში ფინანსთა მინისტრის მოადგილე, მინისტრის საპარლამენტო მდივანმა გიორგი კაკაურიძემ წარმოადგინა.
„ცვლილებები საჭირო გახდა ორი ძირითადი მიზეზის გამო, პირველი ეს არის განათლების სისტემის რეფომა. მოგეხსენებათ გაჟღერდა ინიციატივა, რომელიც ითვალისწინებს ერთის მხრივ იმ მასწავლებლებისთვის ჯილდოს გაცემას, რომელთაც თავისი ნებით გამოთქვეს სისტემის დატოვების სურვილი, რაზეც მიმდინარე წელს 75 მილიონის დამატება გვიწევს. მეორე მიმართულება კი არის ხელფასების 150-ლარიანი ზრდა სკოლის მასწავლებლებისთვის, რასაც დაახლოებით 20 მილიონი ლარის დამატება სჭირდება. სწორედ ამიტომ ერთ-ერთი მთვარი მიზეზი, რის გამოც ბიუჯეტის ცვლილების საჭიროება დადგა, იყო განათლების რეფორმა“, – განაცხადა გიორგი კაკაურიძემ.
საქართველოს განათლების, მეცნიერების, კულტურისა და სპორტის სამინისტროს ინფორმაციით, 6500- მდე საპენსიო ასაკის პრაქტიკოსმა მასწავლებელმა უკვე გამოთქვა სისტემის დატოვების სურვილი და შესაბამისად, თითოეული მათგანი მიიღებს ჯილდოს, 2 წლის ხელფასის ოდენობით და ჯანმრთელობის დაზღვევას სიცოცხლის ბოლომდე.
სამინისტროს ინფორმაციით, ჯილდოს გაცემის პირველი ეტაპი სავარაუდოდ ოქტომბერში განხორციელდება.
წყარო : edu.aris.ge