07, ოქტომბერი 2019 11:52:00
ადვოკატ ალექსანდრე კობაიძის ინფორმაციით, გარდაცვლილი კაცის საქმეზე, რომლის ცხედარიც მტკვარმა გამორიყა, 4 პირია დაკავებული, მათ შორის 2 პოლიციელი. კობაიძის განცხადებით, ის გარდაცვლილი კაცის მეგობრის გიორგი გეთაშვილის ინტერესებს იცავს. გეთაშვილს გამოძიება, ცრუ ჩვენების მიცემას ედავება.
ალექსანდრე კობაიძე დაცვის ქვეშ მყოფს გუშინ ღამე შეხვდა. პოლიციის შენობიდან გამოსვლის შემდეგ ადვოკატმა პროცედურული ნორმების დარღვევებზეც ისაუბრა.
„მე მიჭირავს დაკავების ოქმი, რომელშიც წერია, რომ ის დაუკავებიათ 2019 წლის 6 ოქტომბერს, 23:09 საათზე ანუ გამოდის, რომ მთელი 24 საათზე მეტი ის დაკავებული არ ყოფილა და მოხალისე ყოფილა, ამ შენობაში ღამე რომ გაათენა. ეს, რა თქმა უნდა, აბსურდია და ჩვენ ამაზე პროცესუალურად ვიდავებთ. რეალურად დააკავეს 5 ოქტომბერს, დაახლოებით 8-9 საათზე. დაკავების ოქმით ჩვენ გვედავებიან, რომ თურმე ცრუ ჩვენება მივეცით. სსკ-ის 370-ე მუხლის მესამე ნაწილით გვედავებიან, რაც ითვალისწინებს თავისუფლების აღკვეთას 3-დან 7 წლამდე. ჩვენ იმედი გვაქვს, რომ ამ ყოველივეს ვერ დაამტკიცებენ.” – აცხადებს ალექსანდრე კობაიძე.
ადვოკატის განმარტებით, მოკლული დავით მუმლაძე და გიორგი გეთაშვილი მეგობრები იყვნენ და ბოლოს გეთაშვილმა მუმლაძე 1-ელ ოქტომბერს ნახა. გეთაშვილს ბრალს სავარაუდოდ, პროკურატურა დღეს წაუყენებს, სასამართლო პროცესი კი სამშაბათს ჩატარდება.
36 წლის დავით მუმლაძეს ოჯახი 1-ელი ოქტომბრიდან ეძებდა. 5 ოქტომბერს, რუსთავში მდინარე მტკვარმა მამაკაცის ცხედარი გამორიყა. არსებული ინფორმაციით, ცხედარს სხეულზე მრავლობითი ჭრილობები ჰქონდა. გარდაცვლილი დავით მუმლაძეა.
წყარო: tv4.ge