07, ოქტომბერი 2019 20:58:00
"რა უბედურებააა კი მაგრამ...რა ბრიჯიტ ბარდო ესა მყავს, ყველა რომ ამ შავ-ყვითელა სარკინოზზე ძალადობს...რა აბია ასეთი ნეტავ" - ასე ეხმაურება უფლებადამცველი სოციალურ ქსელში თამთა თოდაძის ირგვლივ განვითარებულ მოვლენებს. უზენაესი სასამართლოს მოსამართლეობის კანდიდატი პაატა შავაძე ქალზე, რომელიც დეპუტატს ცემაში და გაუპატიურებაში ადანაშაულებს სექსისტური ფრაზებით მოიხსენიებს.
ფრაზებს ადვოკატი არც დეპუტატ ეკა ბესელიას მისამართითაც არ იშურებს. "მოკლედ ეკა ბესელიას გააქვს და გააქვს მისი რააა..ვინც არ ევასება ყველა მანდატს დებს თავმჯდომარის მაგიდაზე....ლამის თავზე გადაგვაჯდა ბანდაჟით!! სააღოლ ხელისუფლებავ..:) ბარემ გამოაცხადეთ სახელმწიფოს მეთაურად და გადააბარეთ ქვეყანაც..." - წერს ადვოკატი ფეისბუქის საკუთარ გვერდზე.
შეგახსენებთ, თამთა თოდაძე "ქართული ოცნების" დეპუტატს, ისნის მაჟორიტარს ილია ჯიშკარიანს გაუპატიურების მცდელობასა და ფიზიკურ ძალადობაში ადანაშაულებს. ჯიშკარიანის თანაშემწეს ძალადობის კვალი ეტყობა და მას სამხარაულის ექსპერტიზის დასკვნაც ადასტურებს.
თოდაძე ამბობს, რომ მას შემდეგ, რაც მან ნასვამ უფროს სექსუალურ ურთიერთობაზე უარი განუცხადა, ჯიშკარიანი გაბრაზდა და კაბინეტში ყველაფერი დალეწა. ინფორმაციას ტელეკომპანია "მთავარი" ავრცელებს. არსებული ინფორმაციით, დეპუტატის შვილი სუს-ში მუშაობს, ამიტომ დაზარალებულს ობიექტური გამოძიების იმედი არ აქვს.