14, ოქტომბერი 2019 17:21:00
დღეს სვეტიცხოვლობაა. ქრისტიანული სამყარო დღესასწაულს ყოველი წლის 14 ოქტომბერს დღესასწაულობს. წირვა აღევლინა ღვთისმშობლის შობის საკათედრო ტაძარში. ჩვენი რეპორტიორი გიამბობთ
ბათუმის ღვთისმშობლის საკათედრო ტაძარში სვეტიცხოვლობასთან დაკავშირებით სადღესასწაულო წირვა მღვდელმა მატათამ აღავლინა,მრევლს დღესასწაულის მნიშვნელობაზე ესაუბრა.
წირვის შემდეგ მრევლმა სვეტიცხოვლობის დღესასწაული, საქართველოს მიულოცა და კვართის დაბრძანების ისტორია გაიხსენა
გადმოცემის მიხედვით, იესო ქრისტეს კვართი წილად მცხეთელ ებრაელებს ხვდათ, რომლებმაც სიწმინდე მცხეთაში ჩაიტანეს. ელიოზმა ის თავის დას გადასცა, რომელმაც კვართი მკერდზე მიიხუტა და სული განუტევა. იგი კვართითურთ დაკრძალეს. საფლავზე კი ამოვიდა ხე, რომელიც მეფე მირიანის ბრძანებით ეკლესიის ასაშენებლად მოუჭრიათ და დაუმზადებიათ შვიდი სვეტი. მათ შორის ერთი, „სახილველად საკვირველი და სასწაულმოქმედი“, ვერ აღუმართავთ. იგი მხოლოდ წმინდა ნინოს ლოცვა-ვედრების შემდეგ აღმართულა იმ ადგილზე, სადაც ქრისტეს კვართი იყო დაკრძალული. აღნიშნულ ადგილზე აშენდა სვეტიცხოვლის ტაძარიც.
საქართველოს მართლმადიდებელი ეკლესია ამ დღეს ასევე წმინდა მოციქულთა სწორის მეფე მირიანისა და დედოფალ ნანას, წმიდა სიდონიასა და აბიათარის ხსენებასაც აღნიშნავს.სვეტიცხოვლობა უქმე დღედ არის გამოცხადებული.