07, ნოემბერი 2019 19:33:00
საქართველოს განათლების, მეცნიერების, კულტურისა და სპორტის მინისტრმა მიხეილ ბატიაშვილმა თანამდებობა დატოვა, თუმცა მან საჯაროდ არ განმარტა რატომ მიიღო ეს გადაწყვეტილება. ვინ მოიაზრება ბატიაშვილის შემცვლელად? სულხან მესხიძე მუშაობდა თემაზე, რომელიც ახლა პირდაპირ ეთერში შემოგვიერთდება.
ის, რომ მიხეილ ბატიაშვილი თანამდებობას ტოვებს ამის შესახებ საზოგადოებას პრემიერ-მინისტრმა მთავრობის სხდომიდან შეატყობინა. გიორგი გახარიამ თქვა, რომ თანაგუნდელმა გადადგომის თხოვნით თავად მიმართა. სხვა დეტალებზე მთავრობის მეთაურს არ უსაუბრია. მედიაში გავრცელებული ინფორმაციის თანახმად, განათლების მინისტრი შესაძლოა, გიორგი ვაშაკიძე ან მაია მიმინოშვილი გახდეს.
უკვე ყოფილი განათლების მინისტრი ამბობს, რომ საქმიანობას დიდ და ცნობილ საერთაშორისო ორგანიზაციებთან გააგრძელებს. ბატიაშვილის თქმით, გადაწყვეტილება პირადია და იმედოვნებს, რომ მას პოლიტიკური სპეკულაციები არ მოყვება, თუმცა ეს გადადგომა ოპოზიციამ უკვე დაუკავშირა ზუგდიდის მე6 სკოლის გარდაცვლილი დირექტორის ია კერზაიას საქმეს, რომელიც გუშინ, სტრასბურგის სასამართლოში დარეგისტრირდა სახელწოდებით -შენგელია საქართველოს წინააღმდეგ. მინისტრი ამბობს, რომ სარჩელის საერთაშორისო სასამართლოში გაგზავნას მიესალმება, თუმცა ამ საქმესთან მისი გადადგომის კავშირს უარყოფს.
ია კერზაიას შვილი ბაჩანა შენგელია კი განათლების მინისტრის გადადგომას სწორედ დედის გარდაცვალების საქმეს უკავშირებს და დარწმუნებულია, რომ მის მიერ სტრასბურგის სასამართლოში სარჩელის გაგზავნის შემდეგ ბატიაშვილს თანამდებობა დაატოვებინეს. შენგელიას თქმით, იგი ხელისუფლებამ წინასაარჩევნოდ მოიშორა.
შეგახსენებთ, ია კერზაია სკოლაში ჩატარებული შემოწმებიდან მალევე საავადმყოფოში ანევრიზმის დიაგნოზით გადაიყვანეს. იგი გასული წლის, 9 დეკემბერს გარდაიცვალა. მისმა შვილმა ბაჩანა შენგელიამ მომხდარზე პასუხისმგებლობა ბატიაშვილს დააკისრა, რადგან თვლის, რომ ია კერზაია ამ შემოწმებით პოლიტიკური შეხედულებების გამო დასაჯეს. ბატიაშვილმა მიმდინარე წლის მარტის თვეში თქვა, რომ გამოძიების დასრულებას ელოდება და დატოვებს თანამდებობას, თუკი კერზაიას საქმეზე მის მიმართ მორალური პასუხისმგებლობა მაინც დადგება. თუმცა საქმეზე გამოძიება პროკურატურამ „დანაშაულის არარსებობის გამო“ შეწყვიტა.