პარლამენტის თავმჯდომარემ, არჩილ თალაკვაძემ ტელეიმედის ეთერში აღიარა, რომ იტალიაში მართლაც იყო წასული, თუმცა მხოლოდ ერთი დღით და ისიც ოჯახთან ერთად. სამი დღის წინ მედიაში გავრცელდა ინფორმაცია, რომ არჩილ თალაკვაძე თბილისის მერთან და უმრავლესობის რამდენიმე წევრთან ერთად კომოს ტბაზე, ერთ–ერთი ბიზნესმენის დაბადების დღეზე წავიდა. იმ დღეს თალაკვაძე არ გამოჩენილა და კომენტარი არ გაუკეთებია, მეორე დილით კი პარლამენტში საკუთარ კაბინეტში მიმართვა ჩაწერა და მედია დეზინფორმაციის გავრცელებაში დაადანაშაულა. თუმცა ამ მიმართვის შემდეგ სოციალურ ქსელში გავრცელდა თვითმფრინავში გადაღებული არჩილ თალაკვაძის ფოტოები, ევროპული საქართველოს წევრმა, გიორგი კანდელაკმა კი განაცხადა, რომ წინა ღამეს სტამბოლი–თბილისის რეისით თალაკვაძემ მასთან და გიგი წერეთელთან ერთად იმგზავრა. ამის შემდეგ თალაკვაძეს კომენტარი აღარ გაუკეთებია და მხოლოდ დღეს საღამოს ტელეიმედის ეთერში განაცხადა, რომ ვიდეო, სადაც ფაქტობრივად ტყუილი თქვა სინამდვილეში ფეიკ ნიუსის უარსაყოფად ჩაწერა:
“გაკეთებული სიუჟეტით რა სურდათ რომ ეთქვათ საზოგადოებისთვის. თითქოს პარლამენტის თავმჯდომარე გაფრინდა კომოს ტბაზე, იქ ისვენების ბიუჯეტის ხარჯზე და არაფერი არ აინტერესებს . 9 ამბიდან დარჩა მხოლოდ ის, რომ პარლამენტის თავმჯდომარე პირად საქმეზე ჩაფრინდა მილანში და მეორე დღეს უკვე იყო სამსახურში.
ძალიან აღმაშფოთა, როცა ოჯახური გასვლის გამო პოლიტიკური ვაი უშველებელი ატეხეს. როგორც პარლამენტის თავმჯდომარე სამუშაო ადგილას ვიყავი ყოველდღე და არანაირი პოლიტიკური შატალო არ ყოფილა რეალურად. მითუმეტეს ამ კრიტიკას ვერ მივიღებ იმ ადამიანებისგან და ისეთი ოპონენტებისგან, ვინც წარსულში ბიუჯეტის ხარჯზე სამეგობროებით დადიოდნენ საზღვარგარეთ.
ჩემი მხრიდან ამ ვიდეოჩართვის გავრცელება აშკარაა რომ არ აღმოჩნდა საკმარისი ამ ისტერიული ფონის და კამპანიის გასანეიტრალებლად, რაც ხელოვნურად იყო შექმნილი. ეს ნათელია, თუმცა ეს იყო პასუხი იმ მომენტში ფეიკნიუსზე, კომოზე ვისვენებდი თუ პარლამენტში ვიყავი. მინდა ჩვენ საზოგადოებას ვუთხრა, რომ გულწრფელად ვწუხვარ შექმნილი უხერხულობისთვის და ნამდვილად ვწუხვარ იმის გამო, რომ ამდენი ლაპარაკი მოყვა ამ ფაქტს, თუმცა მთელი ეს ფეიკი რაც ნახა საზოგადოებამ ააწყვეს ერთადერთ რამეზე, რომ პარლამენტის თავმჯდომარე მილანში ჩავიდა მეუღლესთან და შვილთან ერთად და მეორე დღეს იყო სამსაურში. ეს არის მთელი ამბავი რაც აქედან დარჩა . ყოველ შემთხვევაში მე ჩავთვალე საჭიროდ საზოგადოებისთვის მეთქვა სად ვიყავი, იმიტომ რომ გავრცელდა ინფორმაცია რომ მე წავედი დასასვენებლად, წავედი ბიუჯეტის ხარჯზე, არ მაინტერესებდა ქვეყანაში მიმდინარე მოვლენები. სინამდვილეში სიმართლე იყო ის, რომ ოჯახთან ერთად, მეუღლესთან და შვილთან ერთად ჩავფრინდი მილანში და მეორე დღეს უკვე ვიყავი სამსახურში.“– ამბობს თალაკვაძე.
4
s
s
s