16, იანვარი 2020 21:24:00
აზმაიფარაშვილის ოჯახი შ.პ.ს. „ქონსთრაქშენ დეველოფმენთის“ წინააღმდეგ. ანგისის 9 ნომერში მცხოვრები საცხოვრისის მიმდებარედ, მიმდინარე მრავალფუნქციური სახლის მშენებლობას ეწინააღმდეგება. სამუშაოები 1 წლის წინ დაიწყო და ამ დრომდე მიმდინარეობს. რა რეაგირებას მოახდენს საკითხზე ბათუმის მერია სიუჟეტიდან გაიგებთ.
როგორც მანანა აზმაიფარაშვილი გვეუბნება, მშენებლობა შარშან მარტში დაიწყო, აპრილის ბოლოსთვის კი კორპუსის ნულოვანი სართული მათი სახლის ეზოს უნდა გასწორებოდა, თუმცა ასე არ მოხდა. მშენებლობის შედეგად ზიანი მიადგა მრავალწლოვან ნარგავებს, ჩაინგრა სანიაღვრე არხი, ბზარები გაუჩნდა საცხოვრებელსაც.
აზმაიფარაშვილის თქმით, მან ბათუმის მერიის ზედამხედველობის სამსახურს დახმარების თხოვნით რამდენჯერმე მიმართა, თუმცა უშედეგოდ.
იმ შემთხვევაში, თუკი შეჩერებული მშენებლობის პროცესი განახლდება, მას ბათუმის მერია გადაამოწმებს - ამის შესახებ უწყების მუნიციპალური ინსპექციის არქიტექტურისა და სამშენებლო უსაფრთხოების სამსახურის უფროსმა განაცხადა. ირაკლი მოქიას განმარტებით, ამ შემთხვევაში კანონით დადგენილი შესაბამისი ღონისძიებები განხორციელდება.
შ.პ.ს. „ქონსთრაქშენ დეველოფმენთის“ ინჟინერმა, გოჩა ბერიძემ სატელეფონო საუბრისას გვითხრა, რომ ტელევიზიისთვის კომენტარის გაკეთება მიზანშეწონილად არ მიაჩნია, ხოლო მანანა აზმაიფარაშვილის კითხვებს პირადად უპასუხებს.