მოუწესრიგებელი სანიაღვრე არხები ბათუმის ქუჩებში. უამინობისას, წყლით სავსე გუბეების შედეგად დატბორილი საცხოვრისები წერეთლის 12 ნომერში. ასეთივე სიტუაციაა გოგებაშვილის ქუჩის 28 ნომერში. ასევე იმედაშვილის 15 ნომერშიც, სადაც პრობლემას კანალიზაციის გაუსაძლისი სუნიც ემატება. რას ამბობენ პასუხისმგებელ ორგანოში? თეო ფუტკარაძე მუშაობს თემაზე, დაელოდეთ.
უამინდობისას წყლით სავსე გუბეები ეზოში და დატბორილი საცხოვრებლები წერეთლის 12 ნომერში. უხვი ნალექის დროს, გაუსაძლის მდგომარეობას აქ მოუწესრუგებელი სანიაღვრე არხი ქმნის. სამი წლის განმავლობაში გადაუჭრელ პრობლემაზე ადგილობრივები გვიყვებიან. ბათუმის მერიასთან, უშედეგო წერილობითი ურთიერთობით დაღლილებმა ხმის მიწვდენა საჯაროდ, ჩვენი ეთერით არჩიეს.
წერეთლის 12 ნომერი არ არის ერთადერთი მისამართი ქალაქში, სადაც მოუწერიგებელი მიწისქვეშა კომუნიკაციის გამო ეზოსა და ქუჩაში გამოსვლა უჭირთ. უამინდობისას სარდაფები, კორპუსის პირველი სართული და ეზოები იტბორება იმედაშვილის 15 ნომერშიც. პრობლემას აქ კანალიზაციის გაუსაძლისი სუნიც ემატება. შედეგად, მომრავლებულია მღრღნელები და მწერები.
კიდევ ერთი პრობლემური მისამართი, რომელიც დღეს გადავიღეთ, გოგებაშვილის ქუჩის 28 ნომერია. აქ რეზინის ჩექმა კორპუსის ყველა მაცხოვრებლის გარდერობის ნაწილია. ამბობენ, რომ სხვაგვარად უამინდობისას გარეთ ვერ გადიან.
მიუხედავად იმისა, რომ პრობლემის გადაჭრისთვის წერილობით მცდელობებს მერიაში არ აკლებენ, ინფრასტრუქტურისა და კეთილმოწყობის სამსახურში ჩვენს რესპოდენტებს ისევ ბიუროკრატიისკენ მიუთითებენ. ამბობენ, რომ სპეციალური განაცხადი მერიაში ამხანაგობებმა უნდა დაარეგისტრირონ და რომ მხოლოდ ამის შემდეგ დაიწყებენ პრობლემების ჯერ შესწავლას, შემდეგ კი თანხების მოძიებაზე მუშაობას. თუმცა ეს მხოლოდ „მაცნე“-ს ზარზე მიღებული ზეპირი პასუხია. უწყებაში მოქალაქეებისთვის სატელევიზიო კომენტარი არ გააკეთეს.
2
s
s
s