17 წლის, თამუნა მიქელაძე, მახინჯაურის საზღვაო ლიცეუმის პირველი კურსის სტუდენტი, ახლა გემბანის რიგითი მეზღვაურის პროფესიას ეუფლება.
„რა თქმა უნდა გაცნობიერებული მაქვს, რომ არ არის ადვილი ქალმა მოირგო ასეთი რთული პროფესია, თუმცა იმდენად დიდია ინტერესი, ლტოლვა და სურვილი, რომ ეს ყველაფერი მიქრობს შიშს და პირიქით, მოტივაციას მაძლევს“ - ამბობს ახალგაზრდა გოგო.
მისი თქმით, საზოგადოებისთვის ძნელად დასაჯერებელია, რომ 17 წლის გოგომ შეიძლება შეძლოს ამ გამოწვევის დაძლევა, თუმცა თვლის, რომ პირველი სირთულე უკვე გადავლახა. იგი კურსზე 25 ბიჭთან ერთად სწავლობს.
„ბავშვობაში პოლიციელობა მინდოდა, თუმცა მას შემდეგ, რაც პროფესიით მეზღვაური მამიდაშვილის ისტორიებს ვისმენდი, რადიკალურად შემეცვალა სურვილები. სახლში, რომ განვაცხადე, ზღვაში მინდა წასვლა-მეთქი, გაოცებისგან თვალები გაუფართოვდათ ოჯახის წევრებს. მეუბნებოდნენ, ვერ შეძლებო. ყველას დავუმტკიცე, რომ ეს შესაძლებელია და ახლაც, ამ წუთასაც ამის მტკიცების პროცესში ვარ - გვიყვება თამუნა.
„იყო დისკრიმინაციული მიდგომებიც, რომ ეს კაცის საქმეა და ქალი ზღვაში არ უნდა მიდიოდეს. მე ასე არ ვფიქრობ. ვთვლი, რომ ქალისა და კაცის შესაძლებლობებს შორის განსხვავება არ არის და ეს კლასიფიკაციაც შეუსაბამოა. თავიდანვე ვიყავი ჩვეული ე.წ. „კაცის საქმის“ კეთებას, მამაჩემს ხშირად ვეხმარებოდი და არასდროს გამიმიჯნავს საქმე გენდერული შესაძლებლობების მიხედვით. შტორმსაც ავიტან, ტალღებსაც და სტრესულ გარემოსაც. მე ძლიერი ქალი ვარ, ე.ი მე შემიძლია“ - დასძენს დამწყები მეზღვაური.
სტუდენტი ფიქრობს, რომ მეზღვაურობის მთავარი სირთულე, მაინც, თვეობით ოჯახისგან შორს ცხოვრებაა, თუმცა, პროფესიის არჩევისას, ეს გარემოება ყვალას გაცნობიერებული უნდა ჰქონდეს. "თავდაგადასვლების ძიება, უცხო ქვეყნების კულტურისა და სხვადასხვა ტრადიციების გაცნობა, დაუგეგმავი მარშრუტები - ეს ყველაფერი ყოველღიურ რუტინაზე გაცილებით საინტერესოა“ - ამბობს თამუნა.
სურვილი აქვს გამოსცადოს ნაოსნობაში წასვლის ეუფორია და გემზე ასვლის ნერვიულობა. სურს იცოდეს, რა განცდაა, ტალღებთან გამკლავება. ფიქრობს, რომ ეს შიში დაძლევადია.
მასალა მომზადებულია "ინტერნიუსი საქართველოსთან" და "ინტერნიუსთან" თანამშრომლობით, პროექტის "დამოუკიდებელი მედიის გაძლიერება ევროპასა და ევრაზიაში" ფარგლებში.