24, მარტი 2020 20:47:00
რა ფორმით ჩატარდება საკრებულოს სხდომები აჭარის მუნიციპალიტეტებში, ვიდრე საგანგებო მდგომარეობის რეჟიმი არ მოიხსნება, ამ დრომდე უცნობია. ხულოს, შუახევის, ქედის, ხელვაჩაურის, ბათუმისა და ქობულეთის წარმომადგენლობითი ორგანოები დისტანციური მუშაობის რეჟიმზე არ გადასულან. აღმოჩნდა, რომ რეგიონის მუნიციპალიტეტებში კოლეგები ჯერ არ შეთანხმებულან იმაზე, თუ როგორ უნდა უზრუნველყონ სხდომის ჩატარება.
თვეში ერთხელ, საკრებულოს სხდომის გამართვას თვითმმართველობებს კანონი ავალდებულებს. საკითხების მონახაზი წარმომადგენლობით ორგანოებს აქვთ კიდევაც, თუმცა როგორ უზრუნველყოფენ სხდომის ჩატარებას, როგორც აღმოჩნდა, აჭარის მუნიციპალიტეტებში კოლეგები ჯერ არ შეჯერებულან.
ის, რომ მუნიციპალიტეტებში ინფრასტრუქტურული პროექტები არ უნდა შეჩერდეს, მერიებმა დირექტივა აჭარის მთავრობის თავმჯდომარისგანაც მიიღეს, თუმცა როგორ შეასრულებენ ამ ვალდებულებას, თუ კი ცვლილებები გახდება საჭირო, ან როცა რომელიმე სხვა საკითხზე მერიას საკრებულოს მხარდაჭერა დასჭირდება, არც შუახევში უფიქრიათ.
ხელვაჩაურში ოპოზიცია ფიქრობს, რომ სხდომა დისტანციური იქნება და სოციალურ ქსელში, ერთ ჯგუფში მოიყრიან თავს, თუმცა საკრებულოს თავმჯდომარეს სხვა იდეა აქვს. ნადიმ ვარშანიძე არ გამორიცხავს, რომ საკრებულოს დარბაზში წევრები ერთმანეთის მოშორებით დასხდნენ.
როგორ იმსჯელებს ქედის საკრებულო ქედის მერიის მიერ წარდგენილ წინადადებებზე, გადაწყვეტილება არც აქ მიუღიათ. მმართველი გუნდში ერთ-ერთ ალტერნატივად სხდომის ღია სივრცეში ჩატარებას და დისტანციის დაცვას განიხილავენ.
რა ფორმით ჩატარდება საკრებულოს სხდომები მუნიციპალიტეტებში, ვიდრე საგანგებო მდგომარეობის რეჟიმი არ მოიხსნება და მუშობას ჩვეულ რეჟიმს დაუბრუნდებიან, ამ დრომდე არ უფიქრიათ ქობულეთის და ბათუმის საკრებულოებს.
თუ კი საგანგებო მდგომარეობა არ გაგრძელდა და შეზღუდვა აპრილის ბოლოს მოიხსნება, ამ ვადაში თვითმმართველობებს მინიმუმ ორი გეგმიური სხდომის ჩატარება მოუწევს, მათ შორის ერთი მარტში, რომლისთვისაც მხოლოდ ერთკვირიანი ვადა რჩება.