14, მაისი 2020 17:11:00
18 მაისიდან, ანუ ორშაბათიდან სილამაზის სალონები და ესთეტიკური ცენტრები აღადგენენ მუშაობას. შეზღუდვის მოხსნის შესახებ დღეს საზოგადოებას პრემიერ მინისტრმა აცნობა. გიორგი გახარიამ დღეს გამაღთულ მთავრობის სხდომაზე სხვა მიმართულებებზეც გააკეთა აქცენტები. გადაწყდა, რომ ეკონომიკის აღდგენისთვის განსაკუთრებული ყურადღება ტურიზმს დაეთმობა. ეს კი იმ ქვეყნებში ავიარეისების აღდგენას გულისხმობს, რომლებთანაც უსაფრთხო მწვანე კორიდორი გვაქვს.
დაანონსებული 8 ივნსის ნაცვლად, სილამაზის სალონები და ესთეტიკური მედიცინის ცენტრები 18 მაისს გაიხსნება. როგორც პრემიერ-მინისტრმა მთავრობის სხდომაზე აღნიშნა, საფუძველი ის ეპიდემიოლოგიური მდგომარეობაა, რომელიც ამ დროისთვის ქვეყანაში არის.
იმისთვის, რომ მომსახურება დაჯავშნოთ, რიგი ელექტრონულად უნდა დაიკავოთ. რეკომენდაციაა, მაქსიმალურად იყოს უზრუნველყოფილი რაც შეიძლება ნაკლები ადამიანის თავშეყრა და სოციალური დისტანციის დაცვა.
საგანგებო მდგომარეობის ფარგლებში ისევ ძალაში რჩება კომენდანტის საათი, თუმცა უქმდება შეკრებასთან დაკავშირებული აკრძალვა. როგორც ღია, ისე დახურულ სივრცეში დასაშვები ხდება სამზე მეტი ადამიანის შეკრება, ხოლო ისევ არ შეიძლება სამზე მეტი პირის გადაადგილება ავტომანქანით.
„კრიზისი ჩვენი ქვეყნისთვის უნდა გახდეს შესაძლებლობა“ - განცხადება ასევე პრემიერ მინისტრს ეკუთვნის. გიორგი გახარიამ ასეთ შესაძლებლობად კიდევ ერთხელ დაასახელა ტურიზმი და ისაუბრა მოლოდინებზე, რომელიც გარკვეულ ქვეყნებთან მოლაპარაკებების შედეგად არსებობს. როგორც სხდომაზე აღინიშნა, პირველ ვიზიტორებს ქვეყანა ისრაელიდან მიიღებს. საქართველოსთან ფრენების აღდგენაზე კი სურვილს 20-მდე ავიაკომპანია გამოთქვამს.
ის, რომ ეკონომიკის გაძლიერებისთვის, პოსტკრიზისულ პერიოდში საქართველოს აქვს შანსი ინვესტორებისთვის უფრო მიმზიდველი გახდეს, სხდომის დასრულების შემდეგ გამართულ ბრიფინგზე ისაუბრა ნათია თურნავამაც. ეკონომიკის მინისტრმა ყურადღება ანაკლიის პოტენციალზე გააკეთა.