ქობულეთის მერიაში დასაქმებული TV25.GE-ს უყვება, რომ უწყებაში სახელმწიფო უსაფრთხოების სამსახურია შესული. ინფორმირებული წყაროს ცნობით, მერიაში გამომძიებლები რამდენიმე დღის წინ იმყოფებოდნენ და არქიტექტურის სამსახურის საქმიანობით დაინტერესდნენ.
საქმე სავარაუდოდ, მერიის შენობის უკან მშენებლობის საკითხს ეხება, რომელზეც TV 25-მა რეპორტაჟი მოამზადა. თამარ მეფის გამზირზე მცხოვრები მოქალაქე ამტკიცებს, რომ მის საკუთრებაში არსებული სასტუმრო გვერდით მშენებარე კორპუსის გამო იბზარება. მაია მესხს ეჭვი აქვს, რომ მშენებლობის ნებართვის გაცემის უკან მაღალჩინოსნების ინტერესები იკვეთება.
ქობულეთის მერიის არქიტექტურის სამსახურის უფროსი საგამოძიებო ორგანოში დაბარების ფაქტს უარყოფს. ასლან ქათამაძემ დეტალების გასარკვევად პრესსამსახურში გადაგვამისამართა.
ქობულეთის მერიაში სახელმწიფო უსაფრთხოების სამსახურის შესვლის ფაქტს პრესსამსახურში არ ადასტურებენ.
რა საკითხზე აწარმოებს გამოძიებას სახელმწიფო უსაფრთხოების სამსახური? უწყებაში კომენტარზე უარი გვითხრეს. აქ სატელეფონო საუბრისას აღნიშნეს, რომ ამ ეტაპზე განმარტებებს არ გააკეთებენ.