04, ივნისი 2020 21:10:00
ჩვენი ეთერი არაერთხელ დაგვითმია სოციალური პრობლემებისთვის, მაგრამ ამბავი, რომელსაც მთავარ გამოშვებაში გაგიზიარებთ სხვა დანარჩებისგან აშკარად განსხვავდება.ქობულეთში , სოფელ კოხში 4 წევრიანი ოჯახი სიღატაკის ზღვარს მიღმაა. სახლი, რომელშიც ცხოვრობენ , დაბზარულია. არ აქვთ შემოსავალი. ადამიანებს იმდენად უჭირთ, რომ ხშირად მშივრები იძინებენ. 2 მათგანის ჯანმრთელობის მდგომარეობა კი ძალიან მძიმეა. რას აკეთებს მათთვის მუნიციპალიტეტის ხელმძღვანელობა?
ის, რომ ოჯახში ელემენტარული საყოფაცხოვრებო პირობებიც კი არ არის, ეს კიდევ არაფერია. უკიდურეს სიღატაკესთან ერთად, ადამიანები ცხოვრობენ კედლებში, რომლებიც მათ მუდმივად სიცოცხლის საფრთხის ქვეშ აყენებს. გარდა იმისა, რომ კედლები დაბზარულია, საცხოვრებელს არც ფანჯრები აქვს მრთელი, ამიტომ უამინდობა მათ სახლში ისევე იგრძნობა, როგორც გარეთ. სახლში ვერც მაცივარს იპოვით, ვერც სარეცხ მანქანას და რაოდენ გასაკვირიც არ უნდა იყოს არც ტანსაცმლის კარადები დგას.
4 წევრიანი ოჯახის შემოსავალი მოხუცებული მამის პენსიაა, რომელიც მძიმე ქრონიკული პაციენტია. ზურაბ ევგენიძე საწოლსაა მიჯაჭვული, თან უსინათლო. ოჯახში კიდევ ერთი შეზღუდული შესაძლებლობის მქონე წევრი ცხოვრობს. ისიც სპეციალური პენსიის მიმღებია.
მიუხედავად იმისა, რომ ოჯახი უკიდურეს სიღატაკეში ცხოვრობს, და ოთხი წევრისგან ორი არაშრომისუნარიანია, ევგენიძეებს სოციალური დახმარება მაინც არ აქვთ. სტატუსი 2012 წელს დაკარგეს. მაშინ ოჯახის ერთი წევრი სამუშაოდ თურქეთში იყო წასული. ევგენიძეები ახლა ახალი წლის იმედად არიან. ოჯახს განმეორებით წლის ბოლოსთვის გადაამოწმებენ.
სოციალური მომსახურების სააგენტოში ამტკიცებენ, რომ ოჯახი სოციალური დახმარების მიმღები არასოდეს ყოფილა, რომ ევგენიძეებმა განაცხადით მხოლოდ გასულ წელს მიმართეს, თუცა საჭიროზე მაღალი სარეიტინგო ქულა დაუთვალეს. თემურ ჭანტურიშვილი დღეს ირწმუენბა, რომ სოციალური აგენტი ევგენიძეების მდგომარეობას 10 დღის განმავლობაში შეისწავლის.
ქობულეთის მერია თავს იმით იწონებს, რომ პანდემიის პირობებში ოჯახს სასურსათო კალათით ორჯერ დაეხმარნენ. მუნიციპალიტეტში ასვე დებენ პირობას, რომ ოჯახის დახმარებაზე კიდევ ერთხელ იმსჯელებენ, თუმცა მანამდე აუცილებლად მიაჩნიათ ევგენიძეების მდგომარეობას კიდევ ერთხელ შესწავლა.