სასტუმროები, რომლებიც პანდემიის პირობებში, საკარანტინე სივრცეებად გადაკეთდა, რეგიონის ბიუჯეტს 4 მილიონ 493 ათას 260 ლარი და 98 თეთრი დაუჯდა. საჯარო ინფორმაცია აჭარის ტურიზმის დეპარტამენტიდან გამოვითხოვეთ. უწყებამ იანვრიდან ივნისამდე პერიოდში სულ 23 განთავსების ობიექტთან გააფორმა ხელშეკრულება. დეპარმანეტის თავმჯდომარე ამტკიცებს, რომ მკაცრად გაწერილი კრიტერიუმები ჰქონდათ. არჩევდნენ, ადგილმდებარეობის, ინფრასტრუქტურის და პერსონალის მზაობის მიხედვით, თუმცა სულ სხვა სქემაზე საუბრობს ოპოზიცია და მესამე სექტორი. ვინ რა პრინციპით შეირჩა? გამოიყენა თუ არა მმართველმა გუნდმა კორონავირუსის კრიზისი იმისთვის, რომ ფული მის წრესთან დაახლოებული სასტუმრო ბიზნესისთვის გადაეცა? სასტუმროების მფლობელები კავშირებს კატეგორიულად გამორიცხავენ.
1024 მოქალაქე საკარანტინე სივრცეში- ციფრი რეგიონში 5 ივნისისთვის არსებულ მდგომარეობას ასახავს. აჭარის ტურიზმის და კურორტების დეპარტამენტის მიერ მოწოდებული საჯარო ინფორმაცით, ირკვევა, რომ იანვრიდან 5 ივნისის ჩათვლით, ამ მიმართულებით ბიუჯეტიდან 4 მილიონ 493 ათას 260 ლარი და 98 თეთრი გამოიყო. თანხაში 23 სასტუმროში, ნომრების ღირებულება , სამჯერადი კვება და დეზინფექციის საფასური შედის.
ჰქონდათ თუ არა ქალაქში მდებარე პატარა სასტუმროებს მზაობა და სურვილი საკარანტინე სივრცედ მოწყობისთვის? აღმოჩნდა, რომ ნაწილს ჰქონდა, ნაწილს- არა, ნაწილი - დაკეტილი დაგვხვდა, ნაწილმა კი კითხვაზე პასუხს თავი აარიდა.
„ეიფორია“ იმ სამეულშია მთელი ქვეყნის მასშტაბით, რომელსაც ბიუჯეტიდან ყველაზე მეტი თანხა გადაუხადეს. ინფორმაციის თავისუფლების განვითარების ინსტიტუტის მიერ გავრცელებული ინფორმაციით, სასტუმროსგან 345, ანუ ყველაზე მეტი ოთახის დაქირავება მთავრობას მილიონ 408 ათასი ლარი დაუჯდა. მესაკუთრე თურქი ბიზნესმენი გალიფ ოზთურქია, რომელმაც საქართველოში არაერთი მასშტაბური ინვესტიცია განახორციელა. ფლობს, რამდენიმე კომპანიას. არის „ქართული ოცნების“ ყოფილი მაღალჩინონის, დიმიტრი ქუმსიშვილის ბიზნესპარტნიორი, საჯარო ცნობების თანახმად, ახლობლობს პრემიერ გიორგი გახარიასთან, რამდენჯერმე გადარიცხა მილიონობით თანხა სოლიდარობის ფონდში. ცნობითვის, ეს ის თურქი ბიზნესმენია, რომლის კომპანიებმა საქართველოს კანონმდებლობა და რეგულაციები რამდენჯერმე დაარღვიეს. ჯარიმებისა და გაფრთხილებების მიუხედავად, საქმიანობას მაინც აგრძელებენ. მაგალითისთვის, ოზთურქმა თურქული სკოლა 2016 წელს ბათუმში ისე გახსნა, რომ არც შენობის მშენებლობის ნებართვა ჰქონდა და შემდეგ არც სასწავლო დაწესებულებას გაუვლია ავტორიზაცია.
სასტუმრო „ჩაო“ ბათუმში, გორგილაძის ქუჩაზე, ქალაქის ცენტრალურ ნაწილში მდებარეობს. შენობაში სულ 29 ნომერია განთავსებული. ეს ის განთავსების ობიქეტია, რომელიც აჭარის ტურიზმის დეპარტამენტმა მოიწონა და საკარანტინე სივრცედ შეარჩია, 25 ნომერი დაიქირავა და ჯამში 23 ათას 891 ლარი და 48 თეთრი გადაუხადა. სასტუმროს მფლობელი, თამაზ მახარაძე, როგორც სოციალურ ქსელში აღმოვაჩინეთ, „ქართული ოცნების“ მაჟორიტარ დეპუტატთან პარლამენტში, ანზორ ბოლქვაძესთან მეგობრობს. ცნობისთვის, მახარაძე და აჭარის მთავრობის თავმჯდომარე თორნიკე რიჟვაძე ერთი მუნიციპალიტეტიდან არიან.
60 ლარი ერთი ნომრისთვის, დღეში სამჯერადი კვებით, ჯამში კი 24 ათას 849 ლარი და 0 თეთრი ბიუჯეტიდან. „დაელანი“ ექიმ გოჩა აბაშიძის მფლობელობაშია. სასტუმრო აჭარის ჯანდაცვის სამინისტრომ საკარანტინე სივრცედ ეპიდაფექებიდან მალევე შეარჩია.
სასტუმროების შერჩევის კრიტერიუმები კითხვით ნიშნებს უჩენს ინფორმაციის თავისუფლების განვითარების ინსტიტუტის წარმომადგენელებს. კორუფციულ ინტერესებზე მიუთითებენ ოპოზიციაშიც.
სასტუმროების ნაწილთამ ხელშეკრულება გააფორმა ტურიზმის ეროვნულმა სააგენტომ. რითი იხელმძღვანელა უწყებამ ფასების დადგენის დროს? კითხვები, ბუნებრივია, მათთანაც გვქონდა, თუმცა მენეჯმენტმა მოთხოვნის მიუხედავად, „მაცნეს“ საჯარო ინფორმაცია არ მიაწოდა.
6
s
s
s