09, ივლისი 2020 17:14:00
თვითდასაქმებულები, რომლებსაც პანდემიის პირობებში შემოსავალი დაკარგეს და კომპენსაციის მისაღებად რეგისტრაციის გავლა ვერ მოასწრეს, ვადები გაუხანგრძლივდათ. გადაწყვეტილება პრემიერ მინისტრმა გაახმოვანა. გახარიამ ასევე დააანონსა ახალი სახელმწიფო პროგრამა - „იმოგზაურე საქართველოსთვის“. მთავრობის მეთაურის განცხადებით, ორშაბათიდან უქმდება შეზღუდვა ღია სივრცეში კულტურული ღონისძიებების ჩატარების შესახებ.
მთავრობამ პანდემიის მიზეზით, უმუშევრად დარჩენილი დასაქმებულებისა და თვითდასაქმებულებისთვის კომპენსაციის მისაღებად რეგისტრაციის ვადა 1-ელ აგვისტომდე გაახანგრძლივა.
13 ივლისიდან ღია სივრცეში კულტურული ღონისძიებების გამართვა დასაშვები იქნება. პრემიერ-მინისტრის განმარტებით, შეზღუდვის მოხსნა უპირველესად, შიდა ტურიმზის პოპულარიზაციისთვისაა აუცილებელი, რასაც საზოგადოების მოთხოვნაც ემატება.
გიორგი გახარიამ დღეს შიდა ტურიზმის ხელშეწყობის ახალი სახელმწიფო პროგრამა - „იმოგზაურე საქართველოსთვის“ დააანონსა და საზოგადოებას მასში ჩართვისკენ მოუწოდა. „მოვემზადოთ იმისთვის, რომ როდესაც სრულად გაიხსნება საერთაშორისო ტურიზმი, საუკეთესო გიდები ვიყოთ უცხოელი სტუმრებისთვის. ამიტომ აქტიურად უნდა გამოვიყენოთ ეს დრო, უნდა მივეხმაროთ დარგს“ განაცხადა პრემიერმა.
როგორც გიორგი გახარიამ აღნიშნა, ეკონომიკის სამინისტრო დავალების შესაბამისად, პირდაპირ მოლაპარაკებებს ახორციელებს ევროპულ ავიკომპანიებთან, რათა პირდაპირი ფრენების აღდგენა მოხდეს მაქსიმალურად სწრაფ დროში.