30, ივლისი 2020 21:02:00
ხელვაჩაურის საკრებულოს სხდომა დასრულების შემდეგ, მთელი დღის განმავლობაში ვცდილობდით ვაჟა თავდგირიძესთან დაკავშირებას, თუმცა მას მობილური გამორთული ჰქონდა, რის შემდეგაც მაცნეს გადამღებმა ჯგუფმა თავდგირიძეს საცხოვრებელ სახლში მიაკითხა. სულხან მესხიძე არკვევდა დეტალებს და იგი ახლა პირდაპირ ეთერში შემოგვიერთდება. სულხან, რის გარკვევა შეძელი?
სულ ცოტა ხნის წინ დავბრუნდით სოფელ აჭარისწყლიდან. ჩვენ ვაჟა თავდგირიძის ოჯახში ვიმყოფებოდით. ნაციონალური მოძრაობის წევრმა და აწ უკვე ხელვაჩაურის საკრებულოს ყოფილმა დეპუტატმა კამერის ჩართვამდე მოგვატყუა, რომ პირი, რომელსაც ჩვენ ვეძებდით გვერდით სახლში ცხოვრობდა და ამ მეთოდით მან გზა აგვიბნია. მეზობლებმა კი საპირისპირო გვითხრეს. მე და ჩემი ოპერატორი ვაჟა თავდგირიძის საცხოვრებელ სახლთან ხელმეორედ დავბრუნდი, რა დროსაც იგი დაგვემალა და კარები დაკეტა. ჩვენ ვესაუბრეთ ყოფილი დეპუტატის კარის მეზობლებს, რომლებსაც მისი ჯანმრთელობის მდგომარეობის შესახებ ინფორმაცია არ გააჩნდათ. უფრო მეტიც, მეზობლებისა და სოფელში მცხოვრებლების თქმით, თავდგირიძეს გადაადგილების პრობლემა არასდროს ჰქონია და იგი თითქმის ყოველდღიურად, სოფელსა და ქალქში მოძრაობს. ერთ-ერთი ადგილობრივი იმასაც ამბობს რომ მაჟორიტარი დეპუტატი პასიურობდა და არჩევნებში გამარჯვების შემდეგ ადგილობრივებს არ ხვდებოდა, შესაბამისად მათი პრობლემებით არ ინტერესდებოდა. მოკლედ, ახლა გიჩვენებთ სოფელში ჩაწერილ ინტერვიუებს და დასკვნის გაკეთება თქვენთვის მოგვინდია:
საგულისხმოა, ის გარემოება, რომ დღეს ხელვაჩაურის საკრებულოს სხდომაზე ფრაქციის თავჯდომარემ მიშა ბოლქვაძემ ფარული ჩანაწერი ახსენა: მისი მტკიცებით, საკრებულოს თავჯდომარე ვაჟა თავდგირიძეს შეხვდა და გადაბირება სცადა. ბუნებრივი ეს ჩანაწერი ჩვენ მიშა ბოლქვაძე მოვთხოვეთ, თუმცა მან მტკიცებულების გადმოცემაზე უარი იმ მოტივით განაცხადა, რომ ჩანაწერი ხელსაყრელ დროს უნდა გაასაჯაროვოს. და ბოლოს გეტყვით, რომ ხელვაჩაურის საკრებულომ ვაჟა თავდგირიძის გარიცხვით ერთ-ერთი კრიტიკულად განწყობილი დეპუტატის უფლებამოსილებები შეზღუდა. ანუ დღეიდან მიშა ბოლქვაძე ვერც ანაზღაურებას მიიღებს და არც საჯარო მოხელის სტატუსი და არც საკრებულოს მოწვევის უფლებამოსილება ექნება. შემდეგი სხდომიდან მიშა ბოლქვაძე მხოლოდ რიგითი დეპუტატის სტატუსს შეინარჩუნებს.